आयोगको दाबी: मतदाता नामावली प्रणालीमा कुनै अनधिकृत पहुँच छैन

राजनीति

गृहपृष्ठ
राजनीति

आयोगको दाबी: मतदाता नामावली प्रणालीमा कुनै अनधिकृत पहुँच छैन

choicekhabar मंगलबार, मंसिर २, २०८२

काठमाडौं । निर्वाचन आयोगले मतदाता नामावलीसम्बन्धी कुनै पनि सूचना अनधिकृत व्यक्तिको पहुँचमा नपुगेको भन्दै आफ्नो सूचना प्रणाली पूर्ण रूपमा सुरक्षित रहेको स्पष्ट पारेको छ ।

आयोगले विभिन्न सञ्चार माध्यम र सामाजिक सञ्जालमा आयोगको वेबसाइटमा अनधिकृत पहुँच पुगेर मतदाता नामावलीसम्बन्धी सूचनाहरू फेला परेको भनी गरिएका दाबीहरू प्रति गम्भीर ध्यानाकर्षण भएको जनाएको छ । एक सूचना जारी गर्दै आयोगले नागरिकको कानुन बमोजिम गोप्य राख्नुपर्ने सूचनाको सुरक्षाका लागि आयोग पूर्ण रूपमा प्रतिबद्ध रहेको र सूचना प्रविधिसम्बन्धी विज्ञहरूले प्रणालीको निरन्तर अनुगमन तथा सुरक्षा जोखिम विश्लेषण गरिरहेको बताएको छ ।

सामाजिक सञ्जालमा निर्वाचन आयोगको सूचना प्रणालीबाट लिइएको भनी साझा गरिएका पीडीएफ फाइलहरूको सम्बन्धमा पनि आयोगले प्रस्टीकरण दिएको छ । आयोगका अनुसार ती फाइलहरू विगतमा विभिन्न निर्वाचन प्रयोजनका लागि कानुनसम्मत रूपमा निर्वाचन कार्यालयहरू र राजनीतिक दलहरूलाई उपलब्ध गराइएका सामान्य सूचनाहरू मात्र हुन्, जसले मतदाता नामावलीको मूल प्रणालीको सुरक्षामा कुनै खतरा नरहेको पुष्टि गर्दछ । यसरी आयोगले आफ्नो वेबसाइट तथा मतदाता नामावलीसम्बन्धी सूचनाहरूमा कुनै पनि अनधिकृत पहुँच नपुगेको र सम्पूर्ण तथ्यांक प्रणाली सुरक्षित रहेकोमा जोड दिएको छ ।

प्रकाशित मिति: मंगलबार, मंसिर २, २०८२ ११:१९

प्रतिक्रिया दिनुहोस्