पूर्व चालकले रिसइवीका कारण पानी उद्योगको म्यानेजरको हत्या गरेको खुलासा

राजनीति

गृहपृष्ठ
राजनीति

पूर्व चालकले रिसइवीका कारण पानी उद्योगको म्यानेजरको हत्या गरेको खुलासा

choicekhabar आइतबार, मंसिर १४, २०८२

बारामा किरण बेभरेज नेपाल उद्योगका म्यानेजरको हत्या उद्योगमै पहिले कार्यरत गाडी चालकले गरेको स्पष्ट भएको छ।प्रसौनी गाउँपालिका–६, भलुहीस्थित किरण बेभरेज नेपाल प्रा.लि.का सर्लाहीको धनकौल–२० घर भएका ५० वर्षीय म्यानेजर रामकिशोर सिंह लाई मंसिर ११ गते बेलुकी घाँटी रेटेर हत्या गरिएको थियो। उनको शव उद्योग नजिकै मंसिर १२ गते बिहान फेला परेको थियो।

अनुसन्धानबाट उनले निकालिएको जागिरको रिस साँध्नकै उद्देश्यले उद्योगमा केही समय अघि काम गर्ने वीरगन्ज–२२, मनियारी घर भएका चालक २१ वर्षीय राजनकुमार राम र र सोही स्थानका उनका साथी ३२ वर्षीय प्रमोद साह तुराहा घटनामा संलग्न रहेको खुलेको जिल्ला प्रहरी कार्यालय बाराका प्रहरी निरीक्षक खेमराज नेपालले जानकारी दिए।

प्रहरीका अनुसार मुख्य अभियुक्त राजनकुमार भारत भाग्ने क्रममा पर्साको भिस्वा नाकाबाट पक्राउ परे भने प्रमोद आफ्नै गाउँमा लुकेर बसेको अवस्थामा पक्राउ गरिएको हो।

हत्या किन भयो ?

राजनकुमार उद्योगमा गाडी चालकका रूपमा काम गर्दै आएका थिए। गत वर्ष महागढीमाई मेलाको क्रममा गाडीको कलच प्लेट जलेपछि म्यानेजर सिंह र चालकबीच विवाद र झगडा भएको थियो। त्यसपछि उनी केही समय काम छाडेर गए पनि कात्तिक १ गतेदेखि मंसिर १० गतेसम्म पुनः उद्योगमा कार्यरत थिए।

काममा फर्किएको अवधिमा उनले उद्योगले तोकेको ११० रुपैयाँ प्रति बोतलको पानी ११५–१२० रुपैयाँमा बेच्दै आएको तथ्य खुलेपछि म्यानेजर सिंहले उनीलाई मंसिर १० गतेदेखि निकालिदिएका थिए।

यही रिसका कारण राजनकुमारले आफ्ना साथी प्रमोदसँग मिलेर मंसिर ११ गते राति करिब ८ बजे उद्योगमा पुगेर म्यानेजर सिंहको घाँटी छुराले रेटेर हत्या गरेको प्रहरीको प्रारम्भिक अनुसन्धानले देखाएको छ।
घटनास्थलबाट रगत लागेको फलामको छुरा र एउटा ईट्टा बरामद गरिएको प्रहरीले जनाएको छ।

प्रकाशित मिति: आइतबार, मंसिर १४, २०८२ १७:००

प्रतिक्रिया दिनुहोस्