कर्फ्युका कारण जयनगर–जनकपुर–भङ्गाहा रेल सेवा अनिश्चितकालका लागि स्थगित

समाचार

गृहपृष्ठ
समाचार

कर्फ्युका कारण जयनगर–जनकपुर–भङ्गाहा रेल सेवा अनिश्चितकालका लागि स्थगित

choicekhabar शुक्रबार, साउन १५, २०८३

जनकपुरधाम, साउन १५। जिल्ला प्रशासन कार्यालय धनुषाले जारी गरेको कर्फ्यु आदेशका कारण जयनगर–जनकपुर–भङ्गाहा रेल खण्डमा सञ्चालन हुँदै आएको रेल सेवा अस्थायी रूपमा स्थगित गरिएको छ।

नेपाल रेल्वे कम्पनी लिमिटेडको केन्द्रीय कार्यालय जनकपुरधामले शुक्रबार सूचना जारी गर्दै यात्रुहरूको सुरक्षा अवस्थालाई ध्यानमा राख्दै अर्को सूचना जारी नभएसम्म रेल सेवा बन्द गरिएको जनाएको हो।

कम्पनीका अनुसार प्रमुख जिल्ला अधिकारीद्वारा जारी कर्फ्यु आदेशका आधारमा उक्त निर्णय गरिएको हो। कर्फ्यु कायम रहेसम्म रेल सञ्चालन सम्भव नभएकाले सेवा स्थगित गरिएको सूचनामा उल्लेख छ।

रेल सेवा बन्द हुँदा यात्रुहरूमा पर्न गएको असुविधाप्रति कम्पनीले क्षमायाचना गरेको छ। साथै, सुरक्षा अवस्था सामान्य भई कर्फ्यु हटाइएपछि रेल सेवा पुनः सञ्चालन गरिने पनि कम्पनीले जनाएको छ।

निमित्त प्रशासन प्रमुख अजयकुमार सिंहद्वारा जारी सूचनामा यात्रुहरूलाई रेल सेवासम्बन्धी पछिल्ला जानकारीका लागि कम्पनीका आधिकारिक सूचना तथा सञ्चार माध्यमहरू नियमित रूपमा अवलोकन गर्न आग्रह गरिएको छ।

प्रकाशित मिति: शुक्रबार, साउन १५, २०८३ ११:४४

प्रतिक्रिया दिनुहोस्