सद्भाव र्‍यालीपछि वीरगञ्जमा टायर बालेर प्रदर्शन, घण्टाघर क्षेत्रमा केहीबेर तनाव

समाचार

गृहपृष्ठ
समाचार

सद्भाव र्‍यालीपछि वीरगञ्जमा टायर बालेर प्रदर्शन, घण्टाघर क्षेत्रमा केहीबेर तनाव

choicekhabar शुक्रबार, साउन १५, २०८३

वीरगञ्ज — पर्साको वीरगञ्जमा शुक्रबार आयोजित सद्भाव र्‍याली सम्पन्न भएको केहीबेरपछि घण्टाघर क्षेत्रमा तनावपूर्ण अवस्था सिर्जना भएको छ। प्रदर्शनकारी र प्रहरीबीच केही समय धकेलाधकेल हुँदा सुरक्षा व्यवस्था थप कडा पारिएको छ।

स्थानीय प्रशासन तथा जनप्रतिनिधिहरूको संयुक्त आयोजनामा शान्ति, सामाजिक सद्भाव र आपसी एकताको सन्देशसहित सद्भाव र्‍याली सम्पन्न भएको थियो। र्‍याली सकिएलगत्तै हिन्दु समुदायका केही युवाहरूले सुनसरी र सिराहामा भएका घटनाको विरोध जनाउँदै घण्टाघर क्षेत्रमा टायर बालेर प्रदर्शन गरेका थिए।

प्रदर्शन उग्र बन्न सक्ने संकेत देखिएपछि प्रहरीले तत्काल सुरक्षा सतर्कता बढाउँदै प्रदर्शनकारीलाई नियन्त्रणमा लिन प्रयास गरेको थियो। सो क्रममा प्रहरी र प्रदर्शनकारीबीच केहीबेर धकेलाधकेल भएको प्रत्यक्षदर्शीहरूले बताएका छन्। यद्यपि, स्थिति थप बिग्रन नदिन सुरक्षाकर्मीले अवस्था नियन्त्रणमा लिएका थिए।

घटनापछि वीरगञ्जका संवेदनशील क्षेत्रमा सुरक्षा निगरानी बढाइएको छ। स्थानीय प्रशासनले सर्वसाधारणलाई अफवाहको पछि नलाग्न, संयमता अपनाउन र सामाजिक सद्भाव कायम राख्न सहयोग गर्न आग्रह गरेको छ।

हाल वीरगञ्जको अवस्था सामान्य बन्दै गएको बताइएको छ भने घटनाबारे सुरक्षा निकायले थप निगरानी र आवश्यक अनुसन्धान जारी राखेको जनाएको छ।

प्रकाशित मिति: शुक्रबार, साउन १५, २०८३ १४:४४

प्रतिक्रिया दिनुहोस्