नेपाली भूमिमा पसेर भारतीय एसएसबीले सुस्तामा भत्कायो निर्माणाधीन बाँध, स्थानीयको विरोध

समाचार

गृहपृष्ठ
समाचार

नेपाली भूमिमा पसेर भारतीय एसएसबीले सुस्तामा भत्कायो निर्माणाधीन बाँध, स्थानीयको विरोध

choicekhabar आइतबार, साउन १७, २०८३

१७ साउन, बुटवल । पश्चिम नवलपरासीको सुस्ता क्षेत्रमा भारतीय सशस्त्र सीमा बल ९एसएसबी० नेपाली भूमिमा प्रवेश गरी निर्माणाधीन अस्थायी बाँध भत्काएपछि विवाद चर्किएको छ ।

स्थानीयका अनुसार आइतबार दिउँसो करिब साढे ३ बजेतिर सादा पोसाकमा रहेका करिब १५ जना र हतियारसहित आएका करिब ६० जना एसएसबीका सुरक्षाकर्मी सुस्ता गाउँपालिका–५ थारु टोल क्षेत्रमा प्रवेश गरेका थिए ।

उनीहरूले नेपाली भूमिमा निर्माण भइरहेको करिब १३२ मिटर लामो माटोको कच्ची बाँध भत्काएको स्थानीयले बताएका छन् । भारतीय सुरक्षाकर्मीले बाँध भत्काएपछि स्थानीयले विरोध जनाउँदै प्रतिवाद गरेका थिए ।

सुस्ता बचाउ युवा अभियानका संयोजक योगेन्द्र गौतमले एसएसबीका सुरक्षाकर्मी दुई देशको सीमा मानिएको सिमलको रुखभन्दा करिब ३ सय मिटर नेपालतर्फ प्रवेश गरी बाँध भत्काएको दाबी गरे ।

उनका अनुसार स्थानीयले रोक्ने प्रयास गरे पनि हतियारसहित आएका सुरक्षाकर्मीका कारण प्रतिरोध गर्न नसकिएको र केही समय विवाद भएको थियो ।

यसअघि गत असारमा पनि भारतीय सुरक्षाकर्मी सुस्ता क्षेत्रमा प्रवेश गरी बाँध निर्माण रोक्न दबाब दिएपछि काम रोकिएको थियो ।

सुस्ता नेपाल–भारतबीच लामो समयदेखि विवादित सीमाक्षेत्रका रूपमा रहँदै आएको छ । स्थानीयका अनुसार सीमा स्तम्भको अभाव, नारायणी नदीले धार परिवर्तन गर्नु तथा भारतीय पक्षबाट हुने पटक–पटकको हस्तक्षेपका कारण यहाँ विवाद दोहोरिँदै आएको छ ।

स्थानीय मुन्ना खाँले सीमा व्यवस्थापनमा देखिएको कमजोरी र नदीको बहाव परिवर्तनका कारण सुस्ता क्षेत्रमा समस्या समाधान हुन नसकेको बताए । घटनाबारे सम्बन्धित निकायबाट आधिकारिक धारणा भने सार्वजनिक हुन बाँकी छ ।

प्रकाशित मिति: आइतबार, साउन १७, २०८३ १६:३३

प्रतिक्रिया दिनुहोस्