पर्साका प्रहरी प्रमुख पवन भट्टराईद्वारा मानवसेवा आश्रम वीरगञ्जको अवलोकन, खाद्यान्न तथा भोजन सेवा सहयोग

समाचार

गृहपृष्ठ
समाचार

पर्साका प्रहरी प्रमुख पवन भट्टराईद्वारा मानवसेवा आश्रम वीरगञ्जको अवलोकन, खाद्यान्न तथा भोजन सेवा सहयोग

choicekhabar मंगलबार, साउन २६, २०८३

वीरगञ्ज । जिल्ला प्रहरी कार्यालय पर्साका प्रहरी प्रमुख पवन भट्टराईले मानवसेवा आश्रम वीरगञ्जको अवलोकन भ्रमण गर्दै आश्रममा आश्रित आमाबुबाहरूका लागि खाद्यान्न तथा भोजन सेवा सहयोग गर्नुभएको छ।

अवलोकनका क्रममा प्रहरी प्रमुख भट्टराईले आश्रममा आश्रित असहाय तथा बेसहारा आमाबुबाहरूको अवस्था तथा आश्रमले गर्दै आएको उद्धार, संरक्षण र मानवसेवाका गतिविधिबारे जानकारी लिनुभएको थियो।

सो अवसरमा नेपाल प्रहरीले मानवसेवा आश्रमका प्रत्येक शाखामा २४ सै घण्टा एक जना सादा पोशाकका प्रहरी कर्मचारी परिचालन गरी सुरक्षा तथा आवश्यक समन्वयमा सहयोग गर्दै आएको जानकारी गराइएको थियो। आश्रममा आश्रित व्यक्तिहरूको सुरक्षा तथा संरक्षणमा नेपाल प्रहरीले पुर्‍याउँदै आएको सहयोगप्रति आश्रम परिवारले आभार व्यक्त गरेको छ।

प्रहरी प्रमुख भट्टराईले आगामी दिनमा नेपाल प्रहरी तथा व्यक्तिगत तर्फबाट समेत मानवसेवा आश्रमलाई आवश्यक सहयोग र साथ प्रदान गर्न आफू प्रतिबद्ध रहेको बताउनुभयो। उहाँले मानवसेवा जस्तो पवित्र अभियानलाई प्रभावकारी बनाउन राज्यका निकाय, सुरक्षा निकाय तथा समाजका सबै पक्षबीच सहकार्य आवश्यक रहेको धारणा व्यक्त गर्नुभयो।

कार्यक्रममा मानवसेवा आश्रम पर्सा, वीरगञ्जका संरक्षक तथा मधेश विश्वविद्यालयका उपकुलपति प्रोफेसर डा. दीपक शाक्य, मानवसेवा आश्रम वीरगञ्ज अभिभावक परिवारका संयोजक एवं उद्योग वाणिज्य संघ वीरगञ्जका अध्यक्ष हरि गौतम तथा आश्रमका संस्थापक अभियन्ता देवेश गुप्ताको उपस्थिति रहेको थियो।

मानवसेवा आश्रमले सडकपेटी, सार्वजनिक स्थल तथा विभिन्न कठिन परिस्थितिमा रहेका असहाय, बेसहारा तथा परिवारबाट परित्यक्त व्यक्तिहरूको उद्धार गरी आश्रय, संरक्षण, उपचार तथा पारिवारिक पुनर्मिलनका लागि निरन्तर कार्य गर्दै आएको छ।

प्रहरी प्रमुख भट्टराईको अवलोकन, खाद्यान्न तथा भोजन सेवासहितको सहयोग, सद्भाव तथा आगामी दिनमा समेत सहकार्य गर्ने प्रतिबद्धताप्रति मानवसेवा आश्रम परिवारले हार्दिक आभार व्यक्त गरेको छ।

प्रकाशित मिति: मंगलबार, साउन २६, २०८३ १२:३०

प्रतिक्रिया दिनुहोस्