छोराको हत्या खबर सुनेपछि आमाको मृत्यु, मलेसियाबाट फर्किँदै श्रीमान

समाचार

गृहपृष्ठ
समाचार

छोराको हत्या खबर सुनेपछि आमाको मृत्यु, मलेसियाबाट फर्किँदै श्रीमान

choicekhabar आइतबार, भदौ ७, २०८३

दाङको घोराहीमा छोराको हत्या भएको खबर सुनेपछि आमाको मृत्यु भएको छ। घोराही उपमहानगरपालिका–१७ की ३८ वर्षीया बिना कालाथोकीको छोराको हत्या भएको खबर पाएपछि आइतबार दिउँसो मृत्यु भएको हो।

काठमाडौँको शंखमूलस्थित भ्याली ब्वाइज होस्टलमा बसेर विदेश जाने तयारी गरिरहेका उनका २२ वर्षीय छोरा वसन्त कालाथोकीको दुई दिनअघि धारिलो हतियार प्रहार गरी हत्या भएको थियो।

वसन्त रोजगारीका लागि फ्रान्स जाने तयारीमा काठमाडौँमा भाषा अध्ययन गरिरहेका थिए। उनको हत्या भएको खबर घरमा पुगेपछि आमा बिना विक्षिप्त बनेकी थिइन्। त्यसको केही समयपछि घरमै उनको मृत्यु भएको जिल्ला प्रहरी प्रमुख एसपी दीपक श्रेष्ठले जानकारी दिए।

बिनाको शव पोस्टमार्टमका लागि राप्ती स्वास्थ्य विज्ञान प्रतिष्ठानको शवगृहमा राखिएको छ। उनका श्रीमान् रोमहर्श कालाथोकी रोजगारीका क्रममा मलेसियामा रहेकाले उनी सोमबार नेपाल फर्किँदै छन्। श्रीमान् फर्किएपछि अन्त्येष्टिसहितका प्रक्रिया अघि बढाउने तयारी गरिएको परिवारले जनाएको छ।

घरमा रहेका ११ वर्षीय कान्छा छोरा शिशिरलाई अहिले हजुरबुवाको जिम्मामा राखिएको छ। कालाथोकी परिवारको घरमा एकैपटक परेको दोहोरो शोकले घोराहीको जनप्रिय टोल शोकमा डुबेको छ।

यसैबीच, वसन्तको हत्या आरोपमा प्रहरीले होस्टलमै बस्दै आएका बारा कलैया–३ का २० वर्षीय प्रमित पटेल र १८ वर्षीय शेखर यादवलाई पक्राउ गरेको छ। प्रहरीले घटनाबारे थप अनुसन्धान गरिरहेको जनाएको छ।

प्युठानको बेलवासबाट बसाइँ सरेर घोराही आएका कालाथोकी परिवारको आर्थिक अवस्था सामान्य रहेको स्थानीयले बताएका छन्।

प्रकाशित मिति: आइतबार, भदौ ७, २०८३ ११:१२

प्रतिक्रिया दिनुहोस्