माथिल्लो त्रिशूली ‘३ ए’को टनेलबाट पम्पिङ गरी पानी निकालिँदै , उद्धार कार्य तीव्र

समाचार

गृहपृष्ठ
समाचार

माथिल्लो त्रिशूली ‘३ ए’को टनेलबाट पम्पिङ गरी पानी निकालिँदै , उद्धार कार्य तीव्र

choicekhabar सोमबार, भदौ १५, २०८३

१५ भदौ, काठमाडौं । भोटेकोसीको बाढीपछि गम्भीर संकट उत्पन्न भएको ६० मेगावाट क्षमताको माथिल्लो त्रिशूली ३ ‘ए’ आयोजनाको टनेलबाट पानी बाहिर पम्पिङ गरेर फाल्न सुरु गरिएको छ । गत भदौ १० गते आएको बाढीका कारण यस आयोजनाको टनेलमा ३८ जना व्यक्तिहरू फसेको अनुमान गरिएको छ ।

फसेकाहरूको उद्धारका लागि हिजो रातभरि नै अविरल रूपमा प्रयासहरू जारी राखिएको थियो। यसै क्रममा आज बिहान ३ बजे केवल टनेलको पोर्टल सफा गर्ने दौरान विष्फोट गराएर टनेलको मुख खोलिएको थियो। तर, टनेल भित्र अत्यधिक पानी जमेको भेटिएपछि वाटर पम्पसेटको प्रयोग गरी पानी बाहिर निकाल्ने काम थालिएको हो ।

डिवटरिङ कार्यलाई थप प्रभावकारी बनाउनका लागि ठूलो क्षमताका थप डिजेल जेनेरेटर, पम्प सेट र अन्य आवश्यक उपकरणहरू समेत घटनाथलोमा पुगिसकेका छन् । साथै, टनेलको मुखतर्फ थुप्रिएको ढुङ्गा र माटोलाई हटाएर भित्र प्रवेश गर्ने सुरक्षित मार्ग तयार पार्ने काम तीव्र गतिमा भइरहेको छ।

उद्धार कार्यलाई थप व्यवस्थित र प्रभावकारी बनाउन ऊर्जा, जलस्रोत तथा सिँचाइ मन्त्री, प्राधिकरणका सञ्चालक सुनिलकुमार ढुङ्गेल, कार्यकारी निर्देशक लगायतको उच्च टोली स्वयम् उद्धार स्थलमा पुगेको छ ।

यसका अतिरिक्त, उप–कार्यकारी निर्देशकहरू र भूगर्भविद् लगायतका विज्ञहरूको टोलीले समेत घटनास्थलमा पुगी उद्धारका लागि अन्य वैकल्पिक उपायहरूको गहिरो अध्ययन गरिरहेको छ ।

प्रकाशित मिति: सोमबार, भदौ १५, २०८३ १२:१९

प्रतिक्रिया दिनुहोस्