देशभर श्रद्धा–भक्तिपूर्वक मनाइँदै श्रीकृष्ण जन्माष्टमी

समाचार

गृहपृष्ठ
समाचार

देशभर श्रद्धा–भक्तिपूर्वक मनाइँदै श्रीकृष्ण जन्माष्टमी

choicekhabar शुक्रबार, भदौ १९, २०८३

काठमाडौं- वैदिक सनातन हिन्दू धर्मावलम्बीहरूले आज देशभर भगवान् श्रीकृष्णको पूजा–आराधना गरी श्रद्धा र भक्तिपूर्वक ‘श्रीकृष्ण जन्माष्टमी’ पर्व मनाउँदैछन् । ज्ञानयोग, कर्मयोग र भक्तियोगका प्रणेता भगवान् श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले यस दिनलाई श्रीकृष्ण जन्माष्टमी र रातलाई ‘मोहरात्रि’ भन्ने गरिन्छ।

आजको दिन देशभरका कृष्ण मन्दिरहरूमा श्रीकृष्णको पूजा–आराधना, प्रवचन तथा भजनकीर्तनका साथै महिला–पुरुष दिनभर व्रत बसी रातभर जाग्राम बस्ने प्रचलन छ।

अन्याय, अत्याचार र राक्षसी प्रवृत्तिबाट मानव समुदायको रक्षा गर्न भगवान् विष्णुको आठौँ अवतारका रूपमा जन्मनुभएका श्रीकृष्णले आजीवन सत्यको पक्षमा रहन र सत्कर्म गर्न प्रेरणा दिएका थिए। कुरुक्षेत्रमा कौरवहरूसँगको युद्धका क्रममा अर्जुनलाई उपदेश दिँदै श्रीकृष्णका मुखारविन्दबाट व्यक्त भएको ‘श्रीमद्भागवतगीता’ पवित्र ग्रन्थ मानिन्छ, जुन विश्वभर सर्वाधिक भाषामा अनुवाद भएको विश्वास गरिन्छ । बाल्यकालदेखि नै अनेक लीला देखाएका श्रीकृष्णले पुतना, कन्स, जरासन्ध र शिशुपालजस्ता दानवी प्रवृत्तिको संहार गरेको पौराणिक ग्रन्थहरूमा उल्लेख छ।

यस अवसरमा आज पाटनको मङ्गलबजारस्थित प्रसिद्ध कृष्णमन्दिरमा ठूलो मेला लाग्छ । यसैगरी राजधानीको उत्तरपूर्वी भेगस्थित कागेश्वरी मनोहरा नगरपालिकामा रहेको नवतनधाममा भक्तजनको भीड लाग्छ । राजधानीका विभिन्न स्थानमा रहेका ठूला, साना श्रीकृष्ण मन्दिरमा पनि भक्तजनको भीड लाग्ने गर्छ । यसै उपलक्ष्यमा काठमाडौँका विभिन्न धार्मिक सङ्घसंस्थाद्वारा श्रीकृष्णको झाँकीसहित शोभायात्रा तथा रथयात्रा निकाल्ने चलन छ । यस पर्वका अवसरमा सरकारले आज सार्वजनिक बिदा दिएको छ ।

प्रकाशित मिति: शुक्रबार, भदौ १९, २०८३ ११:१९

प्रतिक्रिया दिनुहोस्