जलवायु परिवर्तन सम्मेलनमा सहभागी हुन वीरगन्ज महानगरको टोली जोमसोम जाँदै

समाचार

गृहपृष्ठ
समाचार

जलवायु परिवर्तन सम्मेलनमा सहभागी हुन वीरगन्ज महानगरको टोली जोमसोम जाँदै

choicekhabar शुक्रबार, भदौ २६, २०८३

वीरगन्ज- स्मुस्ताङको घरपझोङ गाउँपालिकामा आयोजना हुन लागेको “घरपझोङ जलवायु परिवर्तन सम्मेलन, २०८३” मा सहभागी हुन वीरगन्ज महानगरपालिकाको टोली आगामी भदौ ३० गते जोमसोम जाने भएको छ।

जलवायु परिवर्तनका कारण पछिल्लो समय तराई-मधेसमा बढ्दै गएको अत्यधिक तापक्रम र सुक्दै गएका खानेपानीका मुहानको गम्भीर समस्यालाई राष्ट्रिय मञ्चमा उठाउन महानगरले “तात्तिँदै वीरगञ्ज, सुक्दै मधेस” नारा तय गरेको छ। सम्मेलनमा भाग लिन जान लागेका महानगरका प्रशासन प्रमुख किर्ती सुवेदी र वातावरण शाखा प्रमुख राकेश साहलाई एक विशेष कार्यक्रमका बिच शुक्रबार वीरगन्ज बाट बिदाई गरिएको छ।वीरगन्ज महानगरपालिकाका कार्यवाहक मेयर इम्तियाज आलम र प्रमुख प्रशासकीय अधिकृत बसन्त बहादुर बोहराले टोलीलाई शुभकामना दिँदै बिदाइ गरेका हुन्।

त्यसअवसरमा कार्यवाहक मेयर आलमले भने, “जलवायु परिवर्तनको असर हिमाली क्षेत्रमा मात्र सीमित नरहेर तराई-मधेसमा अझ भयावह रूपमा देखिन थालेको छ। वीरगन्जसहित सिङ्गो मधेसमा भूमिगत जलसतह घट्दा खानेपानीको चरम सङ्कट पैदा भएको छ। जोमसोममा हुने यो भेलामार्फत हामी मधेसले भोगिरहेको वातावरणीय सङ्कट र तराईका वास्तविक समस्यालाई दृढताका साथ प्रस्तुत गर्नेछौँ।”

त्यस्तै प्रमुख प्रशासकीय अधिकृत बोहराले सम्मेलनले देशका सबै स्थानीय तहलाई जलवायु अनुकूलनका रणनीति बनाउन एकीकृत मञ्च प्रदान गर्ने बताए। “हिमालदेखि तराईसम्मका स्थानीय तहहरू एकै ठाउँमा उभिएर साझा रणनीति बनाउनु आजको आवश्यकता हो। हाम्रा प्रतिनिधिहरूले मधेशका तर्फबाट ठोस सुझाव र प्रतिवेदन सम्मेलनमा पेस गर्नुहुनेछ,” बोहराले भने।

नेपाल सरकार, प्रदेश सरकार र विभिन्न भगिनी स्थानीय तहहरूको सहयोगमा घरपझोङ गाउँपालिकाले भदौ ३० र ३१ गते जोमसोम कभर्ड हलमा आयोजना गर्न लागेको उक्त सम्मेलनमा मुलुकभरका ७५३ वटै स्थानीय तहका प्रमुख तथा जलवायु विज्ञहरूको सहभागिता रहनेछ।

प्रकाशित मिति: शुक्रबार, भदौ २६, २०८३ १४:०५

प्रतिक्रिया दिनुहोस्