आधाभारमा उच्च क्षमताको सडक निर्माण सम्पन्न

समाचार

गृहपृष्ठ
समाचार

आधाभारमा उच्च क्षमताको सडक निर्माण सम्पन्न

choicekhabar बुधबार, असार २६, २०८१

वीरगंज: पथलैया-हेटौँडा सडकखण्डअन्तर्गत आधाभार क्षेत्रमा उच्च भारवाहन क्षमताको सडक निर्माण भएको छ । उच्च भारवहन क्षमताको दुई किलोमिटर सडक कालोपत्र भएर यसै साता देखि सञ्चालनमा आएको सडक डिभिजन कार्यालय हेटौँडाले जनाएको हो ।

कार्यालयका सूचना अधिकारी रमेश पाण्डेले पहिलो चरणमा आधाभार क्षेत्रमा दुई किलोमिटर सडक स्तरोन्नति भएको बताए । उनले भने “यो सडक पहिलो चरणमा ‘डिबिएम’ र दोस्रो चरणमा अस्फास्ट कालोपत्र गरेकाले अव सडक धासिने समस्या आउने छैन ।” पथलैया-हेटौँडा खण्डमा वीरगञ्ज भन्सार कार्यालय हुँदै आउने अत्यधिक भारका मालवाहक सवारीसाधनले सडक धसिने समस्याको अन्त्य गर्न पहिलो चरणमा दुई किलोमिटर लम्बाइको नमूना सडक तयार पारिएको हो ।

यो आयोजनाको लागत रु चार करोड १२ लाख १७ हजार तीन सय ४८ थियो । गत माघ २२ गते सडक डिभिजन हेटौँडा र निर्माण कम्पनीबीच सम्झौता भएको हो । ठेक्का सम्झौताअनुसार वितेको जेठ ३० गतेभित्रै निर्माण सम्पन्न हुनुपर्नेमा केही समस्याका कारण एक महिना विलम्ब भएको सुचना अधिकारी पाण्डेले बताए ।
सूचना अधिकारी पाण्डेले अस्फास्ट प्रविधिबाट सडक कालोपत्र गर्दा लामो समयसम्म टिकाउ हुने भन्दै हाल परीक्षणका क्रममा भिएस ४० ग्रेडको बिटुमिन प्रयोग गरेर सडक कालोपत्र गरेको जानकारी दिए । यो नमुना सडक प्रभावकारी भएमा अन्यत्र पनि विस्तार गर्ने योजना रहेको सडक डिभिजनका अधिकारीहरूले बताएका छन् ।