मुख्यमन्त्री सोनललाई माओवादीका प्रदेश सांसदहरूले खुलेआम असमर्थन,सांसद अन्सारीले आफ्नो अनुहारमा कालो मोसो लगाउँदै सरकारप्रति असन्तुष्टि

समाचार

गृहपृष्ठ
समाचार

मुख्यमन्त्री सोनललाई माओवादीका प्रदेश सांसदहरूले खुलेआम असमर्थन,सांसद अन्सारीले आफ्नो अनुहारमा कालो मोसो लगाउँदै सरकारप्रति असन्तुष्टि

choicekhabar शनिबार, कात्तिक २२, २०८२

मधेश प्रदेशमा राजनीतिक हलचल तीव्र हुँदै गएको छ । प्रदेश सरकारमा स्थायित्वको संकट झन् गहिरिँदै गएको बेला मुख्यमन्त्री जितेन्द्र सोनललाई माओवादीका प्रदेश सांसदहरूले खुलेआम असमर्थन जनाएका छन् ।

शुक्रबार बसेको प्रदेश सभाको बैठकमा माओवादीका प्रदेश सांसद रहबर अन्सारीले मुख्यमन्त्री सोनल नेतृत्वको सरकारलाई विश्वासको मत नदिने घोषणा गर्दै सदनमा प्रत्यक्ष विरोध प्रदर्शन गरे । उनले आफ्नो अनुहारमा कालो मसो लगाउँदै सरकारप्रति असन्तुष्टि व्यक्त गरेका थिए । अन्सारीको यस्तो कदमले प्रदेशसभाको वातावरण एकछिन त निकै तनावपूर्ण बनाएको थियो ।

सांसद अन्सारीले सदनमा भने, “मुख्यमन्त्री सोनलले जनताको हितका मुद्दा बिर्सेर सत्ताको लोभमा गलत गठबन्धन गरेका छन् । यस्तो सरकारले प्रदेशको हित गर्न सक्दैन, त्यसैले हामी विश्वासको मत दिन सक्दैनौं।” उनले प्रदेशमा बढ्दो बेरोजगारी, भ्रष्टाचार र जनताको समस्या प्रति सरकारको बेवास्ता भएको आरोप समेत लगाए ।

उनीसँगै माओवादी पार्टीकी अर्की महिला सांसदले पनि सोनल सरकारलाई विश्वासको मत नदिने घोषणा गर्दै समर्थन फिर्ता लिने चेतावनी दिइन् । उनले भनिन्, “हामीले परिवर्तनको पक्षमा राजनीति गरेका हौं, तर यो सरकार पुरानै अभ्यास दोहोर्याइरहेको छ । जनताको म्यान्डेटको अपमान भइरहेको छ ।”

यता, मुख्यमन्त्री सोनलले भने विश्वासको मत पाउने दाबी गरेका छन् । उनले प्रदेशसभाबाटै प्रतिक्रिया दिँदै भने, “राजनीतिमा असहमति स्वाभाविक हो, तर हाम्रो सरकार जनताको हितमा काम गरिरहेको छ । केही असन्तुष्ट साथीहरूको कदमले सरकार असफल हुने छैन ।”

मधेश प्रदेशमा हाल सत्तारूढ गठबन्धनभित्र मतभेद तीव्र हुँदै गएको छ । माओवादी सांसदहरूले असमर्थन जनाएपछि अब सरकारमा बहुमत जुटाउने चुनौती मुख्यमन्त्री सोनलका लागि थप गहिरिएको छ । आगामी केही दिनभित्र नै प्रदेशको राजनीतिक भविष्य कता मोडिने हो भन्ने विषयमा सबैको ध्यान केन्द्रित भएको छ ।

राजनीतिक विश्लेषकहरूको मतमा, माओवादी सांसदहरूको यस्तो निर्णयले मधेश प्रदेशको सत्ता समीकरण पुनः लेखिन सक्ने संकेत दिएको छ । यदि माओवादी पार्टी औपचारिक रूपमा समर्थन फिर्ता लिन्छ भने प्रदेश सरकार अल्पमतमा परिणत हुने निश्चित छ । यसले नयाँ सत्ता गठबन्धन वा फेरि नेतृत्व परिवर्तनको संभावना पनि बढाएको छ ।

प्रकाशित मिति: शनिबार, कात्तिक २२, २०८२ १६:३३

प्रतिक्रिया दिनुहोस्