पर्सा–३ मा एमालेको शक्ति प्रदर्शन तीव्र, योगेश भट्टराईको प्रमुख आतिथ्यमा बृहत कार्यकर्ता भेटघाट हुँदै

राजनीति

गृहपृष्ठ
राजनीति

पर्सा–३ मा एमालेको शक्ति प्रदर्शन तीव्र, योगेश भट्टराईको प्रमुख आतिथ्यमा बृहत कार्यकर्ता भेटघाट हुँदै

choicekhabar बुधबार, माघ २१, २०८२

वीरगञ्ज । निर्वाचनको मिति नजिकिँदै जाँदा पर्सा निर्वाचन क्षेत्र नम्बर–३ मा नेकपा एमालेले आफ्नो संगठनात्मक शक्ति प्रदर्शनलाई तीव्र बनाएको छ। फागुन २१ गते हुने प्रतिनिधिसभा निर्वाचनलाई लक्षित गर्दै नेकपा एमाले पर्सा–३ ले आउँदो शनिबार बृहत कार्यकर्ता भेटघाट कार्यक्रम आयोजना गर्ने भएको हो।

नेपाल कम्युनिस्ट पार्टी ९एमाले० का केन्द्रीय कमिटी उपमहासचिव तथा पूर्व मन्त्री, प्रभावशाली युवा नेता योगेश भट्टराईको प्रमुख आतिथ्यमा हुने उक्त कार्यक्रमलाई पर्सा–३ मा एमालेको निर्वाचन अभियानको टर्निङ प्वाइन्टका रूपमा हेरिएको छ। कार्यक्रममार्फत पार्टीको चुनावी रणनीति थप धारिलो बनाउने, संगठन सुदृढीकरण गर्ने तथा कार्यकर्ताबीच आपसी समन्वय र एकता मजबुत बनाउने उद्देश्य राखिएको आयोजकले जनाएको छ।

आगामी निर्वाचनमा पार्टीविरुद्ध भइरहेको चौतर्फी षड्यन्त्रलाई परास्त गर्दै एमाले उम्मेदवारलाई भारी मतले विजयी गराउने लक्ष्यसहित कार्यक्रम आयोजना गरिएको एमाले नेताहरूको भनाइ छ। कार्यकर्ता भेटघाट कार्यक्रममार्फत संगठनलाई जरा–जरा सम्म मजबुत बनाउने, घरदैलो अभियानलाई थप आक्रामक बनाउने तथा विपक्षी शक्तिको भ्रम चिर्ने रणनीति तय गरिने बुझिएको छ।

कार्यक्रमका प्रमुख अतिथि योगेश भट्टराईले देशलाई स्थायित्व, विकास र समृद्धिको बाटोमा अघि बढाउन एमालेको जित अपरिहार्य रहेको सन्देश दिने तयारी गरिएको छ। साथै, पर्सा–३ लाई एमालेको बलियो आधार क्षेत्रका रूपमा स्थापित गर्न कार्यकर्तालाई स्पष्ट कार्यदिशा र चुनावी रणनिति प्रदान गर्ने कार्यक्रम रहेको जनाइएको छ।

नेकपा एमाले पर्सा–३ क्षेत्रीय समन्वय कमिटीको आयोजनामा हुन लागेको कार्यक्रममा केन्द्र, प्रदेश, जिल्ला तथा स्थानीय तहका नेता–कार्यकर्ता, जनप्रतिनिधि तथा संगठनका प्रतिनिधिहरूको उल्लेखनीय सहभागिता रहने बताइएको छ। एमाले नेतृत्वको सामूहिक उपस्थिति र कार्यकर्ताको उत्साहले पर्सा–३ मा चुनावी माहोल थप तातिने आँकलन गरिएको छ।

कार्यक्रमलाई आगामी निर्वाचनका लागि एमालेको शक्ति प्रदर्शन र एकताबद्ध संघर्षको घोषणाका रूपमा लिइएको छ। फागुन २१ गते हुने निर्वाचनमा पर्सा–३ बाट एमालेका युवा उम्मेदवार रूपेश कुमार पाण्डेको जित सुनिश्चित गर्न पार्टी पूर्ण रूपमा मैदानमा उत्रिएको सन्देश दिनेमा कार्यक्रम निर्णायक हुने एमाले नेताहरूको दाबी छ।

पटेर्वा सुगौली गाउँपालिकामा अवस्थित श्री बनसपति गाद्दीमाई मन्दिर परिसरमा हुने उक्त कार्यकर्ता भेटघाट कार्यक्रमलाई भव्य रूपमा सफल बनाउन सम्पूर्ण पार्टीपंक्तिलाई सहभागिताका लागि आह्वान गरिएको छ।

प्रकाशित मिति: बुधबार, माघ २१, २०८२ १२:१२

प्रतिक्रिया दिनुहोस्