वीरगञ्ज मेन रोड–त्रिभुवन राजपथ स्थानान्तरण विवाद पुनः सर्वोच्च अदालतमा, सुनुवाइ जेठ २४ मा

समाचार

गृहपृष्ठ
समाचार

वीरगञ्ज मेन रोड–त्रिभुवन राजपथ स्थानान्तरण विवाद पुनः सर्वोच्च अदालतमा, सुनुवाइ जेठ २४ मा

choicekhabar शुक्रबार, चैत ६, २०८२

वीरगञ्ज । वीरगञ्जको मुख्य सडक (मेन रोड) बाट त्रिभुवन राजपथ स्थानान्तरण (सिफ्ट) सम्बन्धी विवाद पुनः कानुनी बहसमा प्रवेश गरेको छ । सडकको विषयमा सर्वोच्च अदालतमा दायर नयाँ मुद्दाको चैत २ गतेका लागि तोकिएको पेसी स्थगित भई अब जेठ २४ गतेका लागि सुनुवाइ तय गरिएको छ ।

मुख्य सडकका घर र जग्गाधनीहरूले २०८२ असार ३१ गते रिट दर्ता गराएका थिए । यसअघि २०८२ माघ ४ गते संयुक्त इजलासका न्यायाधीशद्वय कुमार रेग्मी र नित्यानन्द पाण्डेयले पूर्ण सुनुवाइका लागि पेस गर्ने आदेश दिएका थिए ।

यसअघि वीरगञ्ज मुख्य सडकका घरधनीहरूले दायर गरेको संयुक्त रिट सर्वोच्च अदालतले खारेज गरिसकेको थियो । सो आदेशको पूर्णपाठ सार्वजनिक भएपछि सडक विस्तारको विषयले पुनः चर्चा पाएसँगै नयाँ विवाद सतहमा आएको हो ।

वीरगञ्ज बचाउ युवा सङ्घर्ष समितिका अनुसार २०७२ सालमा मन्त्रिपरिषद्को निर्णयअनुसार त्रिभुवन राजपथको एलाइनमेन्ट परिवर्तन गरी परवानीपुर हुँदै ड्राइपोर्टसम्म सिफ्ट गरिएको थियो । सो निर्णयपछि राजपथ मेन रोडबाट हटेर परवानीपुर–ड्राइपोर्ट हुँदै बहुअरी–हुलाकी राजमार्गसँग जोडिएको दाबी समितिले गरेको छ ।

समितिका अनुसार पुरानो हाईवे “एच०२” को नामाङ्कन परिवर्तन भई नयाँ मार्ग “एनएच४१” कायम गरिएको छ । वीरगञ्जलाई व्यावसायिक तथा औद्योगिक क्षेत्रका रूपमा विकास गर्ने उद्देश्यले यस्तो निर्णय गरिएको र त्यस आधारमा स्थानीयलाई विस्थापित गर्ने कानुनी आधार नरहेको उनीहरूको तर्क छ ।

यसैबीच, सर्वोच्च अदालतले अघिल्लो रिट खारेज गरेपछि मेन रोड विस्तार (दायाँ–बायाँ २५/२५ मिटर) गर्दै संरचना हटाउनुपर्ने माग पनि उठिरहेको छ । तर मुख्य सडक आसपासका स्थानीयले नयाँ मुद्दाको अन्तिम फैसला नआएसम्म सडक विस्तार वा घर भत्काउने कार्य रोक्नुपर्ने अडान लिएका छन् ।

अर्कोतर्फ, भित्री सडक तथा अन्य क्षेत्रका बासिन्दाले दीर्घकालीन सहरी विकास र यातायात व्यवस्थापनका लागि मेन रोड विस्तार आवश्यक रहेको भन्दै २५/२५ मिटर चौडाइ कायम गर्नुपर्ने धारणा राखेका छन् ।

सर्वोच्च अदालतको आगामी निर्णयले वीरगञ्जको सहरी विकास, यातायात व्यवस्थापन तथा स्थानीय बासिन्दाको भविष्यमा महत्वपूर्ण प्रभाव पार्ने अपेक्षा गरिएको छ ।

प्रकाशित मिति: शुक्रबार, चैत ६, २०८२ १४:२१

प्रतिक्रिया दिनुहोस्