चैती छठको मुख्य दिन आज, वीरगञ्जका घाटहरूमा अस्ताउँदो सूर्यलाई अर्घ दिइँदै

समाचार

गृहपृष्ठ
समाचार

चैती छठको मुख्य दिन आज, वीरगञ्जका घाटहरूमा अस्ताउँदो सूर्यलाई अर्घ दिइँदै

choicekhabar मंगलबार, चैत १०, २०८२

वीरगञ्ज । श्रद्धा, भक्ति र तराई–मधेसको साझा सांस्कृतिक धरोहरका रूपमा मनाइने चैती छठ पर्वको मुख्य दिन आज मङ्गलवार साँझ व्रतालुहरूले अस्ताउँदो सूर्य र छठी मातालाई अर्घ दिँदै छन् ।

चैत शुक्ल पक्षको षष्ठी तिथिमा मनाइने यो पर्वलाई ‘सँझिया घाटे’ पनि भनिन्छ । व्रतालुहरू नदी, पोखरी, तलाउ तथा विभिन्न जलाशयमा तयार पारिएका छठ घाटमा पुगेर सूर्य भगवान् र छठी मातालाई अर्घ दिने छन् ।

वीरगञ्जको घडीअर्वा पोखरी, रानीघाटको सिर्सिया नदी, नगवा, छपकैया, म्रुलीलगायतका प्रमुख छठ घाटहरूमा आज साँझ ठुलो सङ्ख्यामा व्रतालुहरूको उपस्थिति रहने छ ।

अर्घका लागि गहुँ वा चामलको पिठोबाट ठेकुवा, मुला, गाजर, बेसारको हरियो बेर्ना, ज्यामिर, नरिवल, सुन्तला, केरा, स्याउ, पानी सिँगडा, उखु लगायतका फलफूल तथा प्रसादहरू तयार पारिएको छ ।

छठ पर्वको अन्तिम दिन भोलि बुधवार बिहान व्रतालुहरूले छठ घाटमै पुगेर उदाउँदो सूर्यलाई अर्घ दिएपछि पूजा विधिवत् रूपमा समापन हुनेछ ।

चैती छठ पर्व आइतबार ‘नहाय खाय’ विधिबाट सुरु भएको थियो । सोमबार ‘खरना’ विधि सम्पन्न गरेका व्रतालुहरूले मंगलबारदेखि निराहार व्रत जारी राखेका छन् ।

सत्य, अहिंसा र सबै प्राणीप्रतिको सहानुभूति जगाउने तराई–मधेसको महान् चाड छठ वर्षमा दुई पटक ९कात्तिक र चैत० मनाउने गरिन्छ । पछिल्लो समय चैती छठ मनाउनेहरूको सङ्ख्या निरन्तर बढ्दै गएको छ ।

प्रकाशित मिति: मंगलबार, चैत १०, २०८२ ११:१९

प्रतिक्रिया दिनुहोस्