छात्रालाई अनैतिक सम्बन्धका लागि दबाब दिएको आरोपमा मधेस विश्वविद्यालयका कर्मचारी पक्राउ

समाचार

गृहपृष्ठ
समाचार

छात्रालाई अनैतिक सम्बन्धका लागि दबाब दिएको आरोपमा मधेस विश्वविद्यालयका कर्मचारी पक्राउ

choicekhabar बुधबार, चैत १८, २०८२

मधेस विश्वविद्यालय वीरगंजमा कार्यरत एक कर्मचारीलाई पर्सा प्रहरीले पक्राउ गरेको छ । पक्राउ पर्नेमा विश्वविद्यालयका प्रशासन शाखाका कर्मचारी मोहम्मद राजु राउत गद्दी रहेका छन्। छात्रालाई अनैतिक सम्बन्ध राख्न दबाब दिएको आरोपमा प्रहरीले राउतलाई पक्राउ गरेको जनाएको छ ।

पिडित छात्राका अनुसार गद्दीले अनैतिक सम्बन्धको प्रस्ताव राखेका थिए। प्रस्ताव अस्वीकार गरेपछि उनले परीक्षामा अंक घटाइदिने धम्की दिएको तथा स्वीकार गरेमा विभिन्न सुविधा दिने प्रलोभन देखाएका थिए । सुरुमा सहयोगको बहानामा सम्पर्क बढाएका गद्दीले पछि फोन तथा सामाजिक सञ्जालमार्फत अनुपयुक्त सन्देश पठाउँदै निरन्तर मानसिक दबाब सिर्जना गरेका थिए। प्रस्ताव अस्वीकार गरेपछि शैक्षिक भविष्य नै प्रभावित पार्ने धम्की दिएको उजुरीमा उल्लेख छ।

पीडित छात्राले दिएको उजुरीका आधारमा चैत १४ गते जिल्ला प्रशासन कार्यालय पर्सामा मुद्दा दर्ता गरिएको थियो। उजुरी दर्तापछि फरार रहेका गद्दीलाई जिल्ला प्रहरी कार्यालय पर्साको टोलीले खोजतलास गरी नियन्त्रणमा लिएको हो।

पर्सा प्रहरीका प्रवक्ता तथा प्रहरी नायब उपरीक्षक हरि बहादुर बस्नेतका अनुसार आरोपितमाथि आवश्यक कानुनी प्रक्रिया अघि बढाइएको छ र घटनाको थप अनुसन्धान जारी रहेको छ।

प्रकाशित मिति: बुधबार, चैत १८, २०८२ ११:१२

प्रतिक्रिया दिनुहोस्