सभामुख पदका लागि आज उम्मेदवारी दर्ता

राजनीति

गृहपृष्ठ
राजनीति

सभामुख पदका लागि आज उम्मेदवारी दर्ता

choicekhabar शुक्रबार, चैत २०, २०८२

सङ्घीय संसद्को सभामुख पदका लागि आज उम्मेदवारी दर्ता हुँदै छ । निर्वाचन भने चैत २२ गतेका लागि तय गरिएको छ ।

सङ्घीय संसद् सचिवालयका अनुसार शुक्रवार बिहान ११ बजेदेखि दिउँसो २ बजेसम्म उम्मेदवारी दर्ताको समय निर्धारण गरिएको छ । उम्मेदवारी दर्ता सकिए लगत्तै दिउँसो साढे २ बजे उम्मेदवारहरूको अन्तिम सूची सार्वजनिक गरिनेछ ।

निर्वाचनका दिन बस्ने प्रतिनिधि सभा बैठकमा सभामुख पदमा निर्वाचित गरियोस् भनी प्रस्ताव प्रस्तुत गरिनेछ भने समर्थकहरूले त्यसलाई समर्थन गर्नेछन् । उम्मेदवारसम्बन्धी सूचनामाथि सामूहिक छलफलपछि प्रस्तावलाई निर्माणार्थ पेस गरिने कार्यसूची रहेको छ ।

राष्ट्रिय स्वतन्त्र पार्टी ९रास्वपा० ले सभामुख पदका लागि पार्टीका उपसभापति डोलप्रसाद (डीपी) अर्याललाई उम्मेदवार बनाउने निर्णय गरेको छ । बिहीबार बसेको पार्टी बैठकले अर्याललाई अगाडि सार्ने निर्णय गरेको हो । प्रतिनिधि सभामा रास्वपा १८२ सिटसहित सबैभन्दा ठुलो दल रहेकाले अर्याल सभामुखमा निर्वाचित हुने प्रबल सम्भावना रहेको छ ।

हाल सभामुख पद रिक्त रहेकाले प्रतिनिधि सभाका ज्येष्ठ सदस्य अर्जुन नरसिंह केसीले बैठकको अध्यक्षता गर्दै आएका छन् ।

यसैबिच, सभामुख निर्वाचन सम्पन्न भएपछि चैत २३ गते राष्ट्रिय सभा उपाध्यक्ष पदका लागि निर्वाचन गर्ने तालिका छ । उक्त पदका लागि चैत २२ गते उम्मेदवारी मनोनयन दर्ता गरिनेछ ।

अघिल्लो राष्ट्रिय सभा उपाध्यक्ष विमला घिमिरेको कार्यकाल २० फागुनमै सकिएकाले उक्त पद हाल रिक्त रहेको छ ।

प्रकाशित मिति: शुक्रबार, चैत २०, २०८२ १०:३६

प्रतिक्रिया दिनुहोस्