लिटिल एन्जल स्कुलका विद्यार्थीद्वारा विपश्यना ध्यान केन्द्रको शैक्षिक अवलोकन तथा ध्यान अभ्यास

राजनीति

गृहपृष्ठ
राजनीति

लिटिल एन्जल स्कुलका विद्यार्थीद्वारा विपश्यना ध्यान केन्द्रको शैक्षिक अवलोकन तथा ध्यान अभ्यास

choicekhabar शनिबार, जेठ २३, २०८३

वीरगञ्ज । वीरगञ्ज महानगरपालिका वडा नं. २४ ज्योतिनगरस्थित लिटिल एन्जल बोर्डिङ स्कुलमा अध्ययनरत कक्षा ९ र १० का विद्यार्थीहरूले विपश्यना ध्यान केन्द्रको शैक्षिक अवलोकन तथा ध्यान अभ्यास गरेका छन् । विद्यार्थीहरूलाई आत्मअनुशासन, मानसिक एकाग्रता तथा ध्यानसम्बन्धी व्यावहारिक ज्ञान प्रदान गर्ने उद्देश्यले उक्त कार्यक्रम आयोजना गरिएको विद्यालयले जनाएको छ ।

अवलोकन भ्रमणका क्रममा विद्यार्थीहरूले विपश्यना ध्यान पद्धतिबारे जानकारी प्राप्त गरेका थिए । विशेषगरी ‘आनापान ध्यान’ (अनापना मेडिटेसन) सम्बन्धी प्रशिक्षण दिइएको थियो । प्रशिक्षकहरूले श्वासप्रश्वासको सचेत अभ्यासमार्फत मनलाई शान्त, एकाग्र तथा सकारात्मक बनाउन सकिने जानकारी दिएका थिए ।

ध्यान केन्द्रका प्रशिक्षकहरूले नियमित ध्यान अभ्यासले विद्यार्थीहरूको अध्ययनप्रति ध्यान केन्द्रित गर्न, तनाव व्यवस्थापन गर्न तथा सकारात्मक सोचको विकास गर्न सहयोग पुग्ने बताएका थिए । कार्यक्रममा सहभागी विद्यार्थीहरूले पनि ध्यान अभ्यासको अनुभव प्रेरणादायी तथा उपयोगी रहेको प्रतिक्रिया दिएका थिए ।

विद्यालय प्रशासनका अनुसार यस्ता शैक्षिक तथा व्यक्तित्व विकाससम्बन्धी कार्यक्रमहरूले विद्यार्थीहरूको समग्र विकासमा महत्वपूर्ण योगदान पुर्‍याउने भएकाले आगामी दिनमा पनि यस्ता गतिविधिलाई निरन्तरता दिइनेछ ।

विद्यालयका प्रिन्सिपल सन्नी पाख्रिङले विपश्यना ध्यान केन्द्रको अवलोकन तथा आनापान ध्यान अभ्यासबाट विद्यार्थीहरूले मानसिक स्वास्थ्य, आत्मनियन्त्रण र अनुशासित जीवनशैलीबारे महत्वपूर्ण ज्ञान हासिल गरेको बताउनुभयो । उहाँले यस्ता आध्यात्मिक तथा नैतिक शिक्षामूलक कार्यक्रमले विद्यार्थीहरूमा शान्ति, सकारात्मक सोच तथा व्यवहारिक ज्ञानको विकास हुने भएकाले विभिन्न रचनात्मक क्रियाकलापमा विद्यार्थीहरूको सहभागिता आवश्यक रहेको उल्लेख गर्नुभयो ।

प्रकाशित मिति: शनिबार, जेठ २३, २०८३ १५:३५

प्रतिक्रिया दिनुहोस्