रास्वपा केन्द्रीय कार्यालयमा बाराका कार्यकर्ताको प्रदर्शन, निर्वाचन परिणामबारे विवाद

राजनीति

गृहपृष्ठ
राजनीति

रास्वपा केन्द्रीय कार्यालयमा बाराका कार्यकर्ताको प्रदर्शन, निर्वाचन परिणामबारे विवाद

choicekhabar आइतबार, जेठ २४, २०८३

राष्ट्रिय स्वतन्त्र पार्टीको केन्द्रीय कार्यालय बनस्थलीमा बाराको कलैया उपमहानगरपालिकाका कार्यकर्ताहरूले प्रदर्शन गरेका छन्। नगर अधिवेशनको निर्वाचन परिणामलाई लिएर विवाद उत्पन्न भएपछि पारदर्शिताको माग गर्दै उनीहरूले आइतबार धर्ना दिएका हुन्।

आन्दोलनरत कार्यकर्ताका अनुसार कलैया उपमहानगरपालिकाको नगर अधिवेशनमा उमाशंकर रौनियार १२४ मत प्राप्त गरी सभापतिमा निर्वाचित भएका थिए। निर्वाचन सम्पन्न भएपछि निर्वाचित पदाधिकारीहरूको शपथ ग्रहणसमेत भइसकेको उनीहरूको भनाइ छ।

तर त्यसपछि पुनः निर्वाचन गराउने सूचना जारी गरिएपछि विवाद चर्किएको कार्यकर्ताहरूले बताएका छन्। उनीहरूका अनुसार मधेश प्रदेश समितिले ५० प्लस १ बहुमत नपुगेको कारण देखाउँदै पुनः निर्वाचनको सूचना जारी गरेको हो।

प्रदर्शनकारीहरूले उक्त निर्णय पार्टी विधान र लोकतान्त्रिक प्रक्रियाविपरीत रहेको आरोप लगाएका छन्। एकपटक निर्वाचन सम्पन्न भई विजयी घोषणा गरिसकेपछि पुनः निर्वाचन गराउने निर्णय स्वीकार्य नहुने उनीहरूको भनाइ छ।

कार्यकर्ताहरूले कुनै आधिकारिक लेटरहेड वा हस्ताक्षरबिना सामाजिक सञ्जालमार्फत निर्वाचन रद्द गरिएको सूचना सार्वजनिक गरिएको भन्दै आपत्ति जनाएका छन्। उनीहरूले पार्टी नेतृत्वसँग स्पष्ट जवाफ, निष्पक्ष छानबिन तथा विधानसम्मत निर्णयको माग गरेका छन्।

साथै, अधिवेशन प्रक्रियामा पारदर्शिता कायम गर्दै संगठनभित्र लोकतान्त्रिक अभ्यासलाई सुदृढ बनाउन पार्टी नेतृत्वको ध्यानाकर्षण गराएका छन्।

प्रकाशित मिति: आइतबार, जेठ २४, २०८३ १७:२१

प्रतिक्रिया दिनुहोस्