अन्तर्राष्ट्रिय बजारमा सुनको भारी गिरावट नेपाली बजारमा तोलामा दुई हजार नौ सयले सस्तो

अर्थ

गृहपृष्ठ
अर्थ

अन्तर्राष्ट्रिय बजारमा सुनको भारी गिरावट नेपाली बजारमा तोलामा दुई हजार नौ सयले सस्तो

choicekhabar मंगलबार, कात्तिक ११, २०८२

काठमाडौं । अन्तर्राष्ट्रिय बजारमा आएको तीव्र मूल्य घटबढको सीधा असर अहिले नेपाली सुन बजारमा पनि देखिएको छ। लगातार घट्दो क्रममै रहेको सुनको भाउ मंगलबार एकै दिन प्रतितोला दुई हजार नौ सय रुपैयाँले घटेपछि बजारमा थप चहलपहल घटेको छ। नेपाल सुन–चाँदी व्यवसायी महासंघका अनुसार मंगलबारको कारोबारमा छापावाला सुन प्रतितोला दुई लाख ३७ हजार रुपैयाँमा झरेको हो। अघिल्लो दिन सोमबार सुन तोलामा दुई हजार रुपैयाँले घटेर दुई लाख ३९ हजार नौ सय रुपैयाँमा पुगेको थियो।

महासंघका अनुसार तिहारपछि मात्रै सुनको मूल्यमा १६ हजार पाँच सय रुपैयाँको गिरावट आएको छ। पछिल्ला दिनमा अन्तर्राष्ट्रिय बजारमा सुनको दर लगातार ओरालो लाग्दा त्यसको प्रभाव नेपाली बजारमा पनि स्पष्ट रूपमा परिरहेको छ। अन्तर्राष्ट्रिय बजारमा सोमबार बेलुका मात्र सुन प्रतिऔंस करिब ३ प्रतिशतले घटेको र अहिले यसको मूल्य ३,९७५ अमेरिकी डलरमा कारोबार भइरहेको अन्तर्राष्ट्रिय समाचार एजेन्सीहरूले जनाएका छन्। केही हप्ता अघि मात्र सुन प्रतिऔंस ४,४०० डलर पुगेर ऐतिहासिक उचाइमा पुगेको थियो।

सुनसँगै चाँदीको मूल्य पनि घटेको छ। मंगलबार चाँदी तोलामा ६० रुपैयाँले घटेर दुई हजार नौ सय २० रुपैयाँमा कारोबार भइरहेको महासंघले जनाएको छ। धातु बजारका जानकारहरूका अनुसार अमेरिकाको ब्याजदर बढ्ने सम्भावना, डलरको मजबुती र अन्तर्राष्ट्रिय मागमा आएको कमीका कारण सुनको दरमा लगातार दबाब देखिएको हो। “अन्तर्राष्ट्रिय बजार स्थिर नहुँदासम्म नेपाली बजार पनि प्रभावित रहन्छ,” एक सुन व्यापारीले भने, “नयाँ लगानीकर्ताहरू अहिले प्रतिक्षामा छन्।”

सुन–चाँदीमा आएको यो मूल्य गिरावटले बजारमा अस्थिरता ल्याएको छ। उपभोक्ताका लागि यो मूल्य घट्दो अवस्था अवसरका रूपमा देखिए पनि सुन व्यवसायीका लागि भने घाटा र अनिश्चितताको समय बनेको छ। बजार विश्लेषकहरूका अनुसार आगामी केही सातासम्म सुनको मूल्यमा अझ उतारचढाव जारी रहने अनुमान गरिएको छ।

प्रकाशित मिति: मंगलबार, कात्तिक ११, २०८२ १५:२७

प्रतिक्रिया दिनुहोस्