वीरगञ्जमा अर्थमन्त्री खनाल र उद्योगीबीच विशेष छलफल, लगानीमैत्री नीति निर्माणमा जोड

अर्थ

गृहपृष्ठ
अर्थ

वीरगञ्जमा अर्थमन्त्री खनाल र उद्योगीबीच विशेष छलफल, लगानीमैत्री नीति निर्माणमा जोड

choicekhabar शुक्रबार, कात्तिक २१, २०८२

वीरगञ्ज : वीरगञ्ज उद्योग वाणिज्य संघले अर्थमन्त्री रामेश्वर खनालसँग एक विशेष भेटघाट तथा छलफल कार्यक्रम आयोजना सम्पन्न भएको छ। संघको सभाहलमा सम्पन्न कार्यक्रममा अर्थमन्त्री खनाल, उद्योग मन्त्रालयका उच्च अधिकारीहरू, संघका पदाधिकारी र वीरगञ्जका प्रमुख उद्योगी व्यवसायीहरूको उपस्थिती रहेको थियो।
कार्यक्रममा सहभागी व्यवसायीहरूले हालको आर्थिक अवस्थाबारे चिन्ता व्यक्त गर्दै उद्योग क्षेत्रले भोगिरहेका कर सम्बन्धी समस्या, आयात–निर्यातमा आइरहेका अवरोध, लगानीमैत्री नीति निर्माणको आवश्यकता र उद्योग विस्तारका चुनौतीहरूबारे धारणा राखेका थिए।
अर्थमन्त्री खनालले निजी क्षेत्र राष्ट्रको आर्थिक मेरुदण्ड भएको उल्लेख गर्दै सरकारले उद्योग र व्यापारलाई सहज र पारदर्शी वातावरण प्रदान गर्न प्रतिबद्ध रहेको बताए। उनले उद्योग क्षेत्रबाट आएका सुझावहरूलाई नीतिगत सुधारमा समेटने प्रतिवद्धता पनि जनाए। अर्थमन्त्री खनालले सरकारले निजी क्षेत्रसँग सहकार्य गरेर अर्थतन्त्र सुदृढीकरणमा जोड दिने बताएका छन्।

कार्यक्रमको समापनमा वीरगञ्ज उद्योग वाणिज्य संघका अध्यक्ष हरीप्रसाद गौतमले अर्थमन्त्रीप्रति धन्यवाद व्यक्त गर्दै वीरगञ्जलाई देशको प्रमुख औद्योगिक केन्द्रको रूपमा विकास गर्न संघ निरन्तर सहयोग गर्न तत्पर रहेको बताए।