तीन महिनापछि चितवन निकुञ्जमा जिप सफारी सुरु, पर्यटक बढ्ने अपेक्षा

समाचार

गृहपृष्ठ
समाचार

तीन महिनापछि चितवन निकुञ्जमा जिप सफारी सुरु, पर्यटक बढ्ने अपेक्षा

choicekhabar सोमबार, असोज २६, २०८३

२६ असोज, चितवन । बर्खायाम सुरु भएसँगै बन्द गरिएको प्रसिद्ध चितवन राष्ट्रिय निकुञ्जभित्रको जिप सफारी असोज २३ गतेदेखि पुनः सञ्चालनमा आएको छ । असार १७ गतेदेखि रोकिएको सफारी निकुञ्जभित्रका मुख्य सडक तथा रुटहरूको मर्मतसम्भारपश्चात् खुला गरिएको हो ।

अविरल वर्षा र असोज दोस्रो साता आएको भीषण बाढीका कारण निकुञ्जभित्रका सवारी सञ्चालन हुने सडकहरू क्षतिग्रस्त बनेका थिए। सडकको मर्मत, बाटोमा ढलेका रुख पन्छाउने तथा झाडी फाँड्ने कार्य सम्पन्न भएसँगै जिप सफारी नियमित गरिएको निकुञ्जका सूचना अधिकारी अविनाश थापा मगरले जानकारी दिए । बाढीका कारण रुटहरू धेरै बिग्रिएकाले यस वर्ष सफारी पुनः खुला गर्न केही समय लागेको उहाँको भनाइ छ ।

निकुञ्जभित्र जिप सफारी बन्द रहेको अवस्थामा पनि मध्यवर्ती क्षेत्र तथा सामुदायिक वनहरूमा भने बाह्रै महिना जिप तथा हात्ती सफारी यथावत् सञ्चालनमा रहने गर्छ ।

चितवन राष्ट्रिय निकुञ्ज घुम्न आउने आन्तरिक तथा बाह्य पर्यटकका लागि विभिन्न नाकाबाट जिप सञ्चालन हुने गर्दछन् । जसअन्तर्गत सौराहाबाट ३२, कसराबाट २२, मेघौलीबाट ११, अमलटारीबाट ८ र माडीबाट १ गरी कुल ७४ वटा जिप निकुञ्जभित्र प्रवेश गर्ने अनुमति पाएका छन् ।

दसैँ(तिहारको पर्यटकीय सिजन सुरु भएसँगै दुर्लभ एकसिङ्गे गैँडा, पाटेबाघ, पाटे मृग, हात्ती तथा विभिन्न प्रजातिका चराचुरुङ्गी अवलोकनका लागि निकुञ्जमा पर्यटकहरूको चहलपहल पुनः बढ्ने विश्वास लिइएको छ।

प्रकाशित मिति: सोमबार, असोज २६, २०८३ १०:५४

प्रतिक्रिया दिनुहोस्