दिल्ली मेट्रोमा सिट विवाद, ४८ वर्षीय पुरुषको मृत्यु

समाचार

गृहपृष्ठ
समाचार

दिल्ली मेट्रोमा सिट विवाद, ४८ वर्षीय पुरुषको मृत्यु

choicekhabar सोमबार, असोज २६, २०८३

भारतको राजधानी नयाँदिल्लीस्थित मेट्रो रेलमा ज्येष्ठ नागरिकका लागि आरक्षित सिटमा बस्ने विषयमा भएको विवादका क्रममा ४८ वर्षीय पवन शर्माको मृत्यु भएको छ ।

प्रहरीका अनुसार गत बिहीबार सर्वोच्च अदालत मेट्रो स्टेसनमा भएको विवादका क्रममा पवनलाई कथित रूपमा थप्पड हान्नुका साथै धकेलिएको थियो । त्यसपछि उनी लड्दा टाउकोमा गम्भीर चोट लागेको थियो ।

घटनामा संलग्न रहेको आरोपमा प्रहरीले पूर्वआईएएस अधिकारी सञ्जय प्रताप सिंह र उनका छोरा सिद्धार्थ सिंहलाई पक्राउ गरेको छ ।

घटनापछि मेट्रोका कर्मचारीले पवनलाई एम्बुलेन्समार्फत लोकनायक जयप्रकाश अस्पताल पुर्‍याएका थिए । तर, चिकित्सकले उनलाई मृत घोषणा गरेका थिए ।

पवनकी आमा दुर्गा शर्माको उजुरीका आधारमा प्रहरीले शुक्रबार मुद्दा दर्ता गरेको थियो । त्यसपछि दुवै आरोपितलाई पक्राउ गरिएको प्रहरी स्रोतले जनाएको छ ।

प्रहरीका अनुसार पूर्वआईएएस अधिकारी सञ्जय प्रताप सिंह यसअघि पनि कथित घुसखोरीसम्बन्धी मुद्दामा केन्द्रीय अनुसन्धान ब्युरो ९सीबीआई०बाट पक्राउ परेका थिए ।

उनका छोरा सिद्धार्थ सिंह भने भारतको सर्वोच्च अदालतमा वकालत गर्छन् ।

घटनाबारे प्रहरीले थप अनुसन्धान गरिरहेको जनाएको छ ।

प्रकाशित मिति: सोमबार, असोज २६, २०८३ ०९:४६

प्रतिक्रिया दिनुहोस्