अमेरिकामा नेपाली मूलका व्यवसायी तारा सिन्चुरीको गोली हानी हत्या

समाचार

गृहपृष्ठ
समाचार

अमेरिकामा नेपाली मूलका व्यवसायी तारा सिन्चुरीको गोली हानी हत्या

choicekhabar शुक्रबार, कात्तिक ६, २०८३

काठमाडौं,०६ कार्तिक । अमेरिकाको ओहायो राज्यमा नेपाली मूलका ५२ वर्षीय व्यवसायी तारा सिन्चुरीको गोली हानी हत्या भएको छ। आफ्नै गहना तथा कपडा पसल सञ्चालन गर्दै आएका सिन्चुरीको हत्यापछि त्यहाँको नेपाली समुदाय शोकमा डुबेको छ।

प्राप्त विवरणअनुसार, मङ्गलबार दिउँसो ओहायोको फेयरफिल्डस्थित आफ्नै पसलभित्र रहेका सिन्चुरीमाथि अज्ञात व्यक्तिले गोली प्रहार गरेका थिए। घटनाको सूचना पाएपछि घटनास्थल पुगेको फेयरफिल्ड प्रहरीले उनलाई पसलभित्र मृत अवस्थामा फेला पारेको थियो।

प्रहरीले प्रारम्भिक अनुसन्धानमा घटनालाई सम्भावित लुटपाटसँग जोडेर हेरेको छ। घटनाको अनुसन्धानका क्रममा आसपासका व्यावसायिक प्रतिष्ठानमा जडान गरिएका सीसीटीभी क्यामेराका दृश्य सङ्कलन गरी आक्रमणकारीको पहिचान र घटनाको वास्तविक कारण पत्ता लगाउने प्रयास भइरहेको छ।

हत्यामा संलग्न व्यक्तिको पहिचान तथा अन्य सम्भावित संलग्नताबारे प्रहरीले अनुसन्धान अघि बढाएको छ। यद्यपि, घटनाको उद्देश्य र संलग्न व्यक्तिबारे थप विवरण सार्वजनिक भइसकेको छैन।

सिन्चुरीको परिवार मूलतः भुटानबाट विस्थापित भई लामो समय नेपालका शरणार्थी शिविरमा बसेको थियो। पुनर्वास कार्यक्रमअन्तर्गत उनी सन् २०१२ मा श्रीमती र छोराछोरीसहित अमेरिका पुगेका थिए।

अमेरिका पुगेपछि मेहनत गरेर आफ्नै व्यवसाय स्थापना गरेका सिन्चुरीको हत्याले उनको परिवारसँगै स्थानीय नेपाली तथा दक्षिण एसियाली समुदायलाई स्तब्ध बनाएको छ।

प्रकाशित मिति: शुक्रबार, कात्तिक ६, २०८३ १२:०१

प्रतिक्रिया दिनुहोस्