‘दाहा’मा डिजे र हतियारको प्रदर्शन गर्न निषेध

समाचार

गृहपृष्ठ
समाचार

‘दाहा’मा डिजे र हतियारको प्रदर्शन गर्न निषेध

choicekhabar बिहीबार, असार १९, २०८२

वीरगन्ज- मुस्लिम धर्मावलम्बीको पर्व मोहर्रमा निकालिने ‘ताजिया’ अर्थात ‘दाहा’डिजे र हतियारको प्रदर्शन निषेध गरिने भएको छ। वीरगन्जमा यही असार २२ गते हुने ‘दाहा’लाई शान्तिपूर्ण रूपमा सम्पन्न गराउनका लागि बिहीबार वीरगन्ज महानगरका मेयर, जिल्लाका सुरक्षा निकायका प्रमुख र मुस्लिम अगुवाहरू बीच आज छलफल भएको छ।

वीरगन्ज महानगरमा भएको छलफलमा ‘ताजिया’ अर्थात ‘दाहा’लाई लक्षित गरी विभिन्न ६ बुँदे निर्णय गरिएको छ। बैठकले असार २२ गते आइतबार परेको ‘ताजिया’ अर्थात ‘दाहा’का दिन वीरगन्जका विभिन्न वडाबाट निकालिने ताजियालाई घण्टाघरमा जम्मा हुन दिने,प्रत्येक वडाबाट निकालिने ताजियाका लागि संयोजन टोली गठन गरी असार २० गतेभित्र जिल्ला प्रशासन कार्यालयलाई जानकारी गराउने, ताजिया निकाल्दा हातहतियार र डिजेको प्रयोग पूर्ण रूपमा निषेध गर्ने,बालबालिकालाई ताजियामा सहभागी नगराउने, जनस्वास्थ्यमा प्रतिकूल असर पार्ने कुनै पनि गतिविधि नगर्ने रनगराउने , वीरगन्ज महानगरका मेयर राजेशमान सिंहको संयोजकत्वमा एक मुस्लिम समुदायका प्रतिनिधि र सुरक्षा निकायका प्रमुखहरू सम्मिलित अनुगमन समिति गठन गर्ने तथा कार्यक्रमको सम्पूर्ण सुरक्षा स्थानीय प्रहरी प्रशासनले गर्ने निर्णय गरेको हो।

गत चैत २८ गते हनुमान जयन्तीका अवसरमा वीरगन्जमा निकालिएको शोभा यात्राका क्रममा भएको तनावपूर्ण अवस्थाको पुनरावृत्ति रोक्न स्थानीय सरकार र सुरक्षा निकायहरू यसपटक गम्भीर र सतर्क देखिएका हुन्। धार्मिक सद्‌भावमा असर पार्ने गतिविधिबाट शिक्षा लिँदै, मुस्लिम समुदायको महत्वपूर्ण पर्व ‘ताजिया’ (दाहा)लाई शान्तिपूर्ण रूपमा सम्पन्न गराउने उद्देश्यले सरोकारवालाहरूबीच छलफल गरिएको हो।

प्रकाशित मिति: बिहीबार, असार १९, २०८२ १७:०३

प्रतिक्रिया दिनुहोस्