नारायणी अस्पतालमा उपचारको क्रममा कैदीको ज्यान गयो, प्रशासनमाथि लापरबाहीको आरोप ,आफन्तद्वारा प्रदर्शन

समाचार

गृहपृष्ठ
समाचार

नारायणी अस्पतालमा उपचारको क्रममा कैदीको ज्यान गयो, प्रशासनमाथि लापरबाहीको आरोप ,आफन्तद्वारा प्रदर्शन

choicekhabar मंगलबार, साउन २७, २०८२

वीरगञ्ज । वीरगञ्जस्थित नारायणी अस्पतालमा उपचारका क्रममा मङ्गलवार एक कैदीको मृत्यु भएको छ । मृतक कैदी वीरगञ्ज महानगरपालिका-२५ खाल्वा टोलाका राहुल साह तुराहा रहेका छन् । उनी २०७९ सालदेखि कर्तव्य ज्यान मुद्दामा अदालतको आदेश अनुसार वीरगञ्ज कारागारमा जन्मकैद सजाय काटिरहेका थिए ।

मृतकका आफन्तले अस्पताल र कारागार प्रशासनमाथि लापरबाहीको आरोप लगाउँदै अस्पताल बाहिर प्रदर्शन गरेका छन् । कारागार प्रशासनका अनुसार, मङ्गलवार बिहान कारागारमा व्यायाम गर्ने क्रममा राहुलको स्वास्थ्यमा समस्या देखिएपछि उनलाई तत्काल नारायणी अस्पताल ल्याइएको थियो । अस्पतालले प्रारम्भिक उपचारपछि थप उपचारका लागि नेशनल मेडिकल कलेज तथा शिक्षण अस्पताल रेफर गरेको थियो । तर, रेफर प्रक्रियामा ढिलाइ भएको र कारागार प्रशासनले समयमै अन्य अस्पताल लैजान अनुमति नदिएको कारण मृत्यु भएको आफन्तको आरोप छ ।

जिल्ला प्रहरी कार्यालय पर्साका प्रवक्ता, प्रहरी नायब उपरीक्षक (डिएसपी) किशोर लम्सालका अनुसार, राहुललाई अन्य अस्पताल लैजाने प्रक्रिया पूरा गर्ने क्रममा उनको मृत्यु भएको हो । मृतकका आफन्तले अस्पताल अगाडि टायर बालेर प्रदर्शन गरेपछि केही समय तनावको स्थिति सिर्जना भएको थियो । हाल अवस्था सामान्य बनेको र मृतकका आफन्तलाई छलफलका लागि जिल्ला प्रशासन कार्यालय पठाइएको डिएसपी लम्सालले बताए । मृतकको शव पोस्टमार्टमका लागि नारायणी अस्पतालमै राखिएको छ ।

आफन्तका अनुसार, नारायणी अस्पतालले राहुललाई अन्यत्र लैजान सुझाव दिएको लामो समयसम्म जेल प्रशासनले आनाकानी गरेको र एम्बुलेन्समा राख्ने क्रममा प्रहरीले रोकेको कारण उपचारमा ढिलाइ भएको हो । “राहुललाई एम्बुलेन्समा राख्न लाग्दा प्रहरीले रोकेर अस्पतालमै राख्यो, जसले गर्दा उपचार नपाएर उनको मृत्यु भयो,” एक आफन्तले बताए । उनीहरूले घटनाको निष्पक्ष छानबिन र दोषीमाथि कारबाहीको माग गरेका छन् ।

यता, नारायणी अस्पताल प्रशासनले भने राहुललाई सम्भव भ्याएसम्मको उपचार प्रदान गरिएको र तत्कालै थप उपचारका लागि रेफर गरिएको दाबी गरेको छ । घटनापछि अस्पताल वरपरको सुरक्षा व्यवस्था कडा पारिएको छ ।

जिल्ला प्रशासन कार्यालय पर्सामा मृतकका आफन्त र प्रशासनबिच छलफल भइरहेको छ । घटनाले जेल र अस्पताल प्रशासनको समन्वय र आपत्कालीन स्वास्थ्य सेवाको प्रभावकारितामाथि प्रश्न उठाएको छ ।

प्रकाशित मिति: मंगलबार, साउन २७, २०८२ १३:३५

प्रतिक्रिया दिनुहोस्