सरकारले डिम्ब–वीर्य दान तथा निःसन्तान सेवामा नयाँ मापदण्ड जारी

समाचार

गृहपृष्ठ
समाचार

सरकारले डिम्ब–वीर्य दान तथा निःसन्तान सेवामा नयाँ मापदण्ड जारी

choicekhabar आइतबार, भदौ १, २०८२

काठमाडौं,
सरकारले डिम्ब (अण्डा) र वीर्यको अवैध बेचबिखन तथा दुरुपयोग रोक्न ‘निःसन्तान व्यवस्थापन सेवा सञ्चालनसम्बन्धी मापदण्ड २०८२’ स्वीकृत गरेको छ। नयाँ मापदण्डले निःसन्तान उपचार सेवालाई व्यवस्थित गर्नका लागि विस्तृत नियम तय गरेको छ। डिम्ब दान गर्ने महिलाको उमेर २०–३५ वर्षसम्म सीमित गरिएको छ र जीवनभर एक महिलाले ६ पटकभन्दा बढी डिम्ब दान गर्न पाउने छैनन्। हरेक डिम्ब दानबीच कम्तीमा तीन महिनाको अन्तर अनिवार्य गरिएको छ। विवाहित महिलाले डिम्ब दान गर्नका लागि दुवै पति–पत्नीको सहमति अनिवार्य छ।

वीर्य दानका लागि पनि नियम तय गरिएको छ। एक पुरुषले १५ दिनको अन्तरमा अधिकतम १० पटक वीर्य दान गर्न पाउनेछन्। वीर्यदाताको उमेर पनि २०–३५ वर्ष तोकिएको छ। मापदण्डअनुसार, डोनरलाई कुनै आर्थिक प्रलोभनमा पारेर वा जबर्जस्ती दान गराउन पाइने छैन। डोनरको व्यक्तिगत विवरण गोप्य राखिनेछ र सेवा प्रदायक संस्थाले सबै रेकर्ड सुरक्षित राख्नुपर्नेछ।

यी सेवा प्रदान गर्ने सबै संस्थाले अनिवार्य रूपमा स्वास्थ्य मन्त्रालयबाट अनुमति लिनुपर्ने व्यवस्था गरिएको छ। मापदण्ड पालना नगर्ने संस्थाको सेवा बन्द गरिने प्रावधान समेत राखिएको छ। साथै, मन्त्रालयले सेवा शुल्क निर्धारण गर्नेछ र प्रत्येक संस्थाले आफ्नो सेवाको १० प्रतिशत भाग गरिब तथा विपन्न वर्गका लागि निःशुल्क उपलब्ध गराउनुपर्नेछ।

प्रकाशित मिति: आइतबार, भदौ १, २०८२ १५:०४

प्रतिक्रिया दिनुहोस्