अवरुद्ध शौक्षिक क्रियाकलाप पुनः सञ्चालन गर्न प्याब्सनको आग्रह

समाचार

गृहपृष्ठ
समाचार

अवरुद्ध शौक्षिक क्रियाकलाप पुनः सञ्चालन गर्न प्याब्सनको आग्रह

choicekhabar शनिबार, भदौ २८, २०८२

वीरगंज । निजी तथा आवासीय विद्यालय अर्गनाइजेशन (नेपाल प्याब्सन), पर्साले जेन्जी आन्दोलनका शहीदहरूप्रति श्रद्धाञ्जली अर्पण गर्दै पर्सा जिल्लामा अवरुद्ध शैक्षिक क्रियाकलाप तत्काल पुनः सञ्चालन गर्न आह्वान गरेको छ।

प्याब्सन पर्साका अध्यक्ष सरोज चौधरी र सचिव अशोक संग्रौलाले संयुक्ति रुपमा आज शनिबार प्रेस विज्ञप्ति जारी गर्दै भदौ २३ र २४ गते देशभर भएको ऐतिहासिक जेन्जी आन्दोलनका क्रममा शहादत प्राप्त सम्पूर्ण शहीदहरूलाई हार्दिक श्रद्धाञ्जली व्यक्त गरेका हुन् । जारी विज्ञप्तिमा शोकसन्तप्त परिवारप्रति समवेदना र घाइतेहरूलाई शीघ्र स्वास्थ्यलाभको कामना समेत गरिएको छ।

विज्ञप्तिमा जेन्जी आन्दोलनको बलिदानले देशको राजनीतिक, सामाजिक र नैतिक चेतनामा ऐतिहासिक परिवर्तन ल्याएको उल्लेख छ। सोही परिणामस्वरूप देशले पहिलो महिला प्रधानमन्त्रीको रूपमा सम्माननीय सुशिला कार्कीलाई पाएकोमा आशा प्रकट गर्दै, नयाँ सरकारले भ्रष्टाचारमुक्त शासन, सामाजिक न्याय र समावेशी समृद्धिको दिशामा सार्थक परिणाम ल्याउने अपेक्षा व्यक्त गरिएको छ।

शिक्षा क्षेत्रलाई राष्ट्रिय पुनर्निर्माणको आधारस्तम्भको रूपमा लिने सरकारको अपेक्षा गर्दै, प्याब्सनले पर्सा जिल्लामा पछिल्ला पाँच महिनादेखि अवरुद्ध शिक्षण–सिकाइ क्रियाकलाप तत्काल सुरु गर्न सबै सरोकारवालाहरूलाई संवेदनशील हुन आग्रह गरेको छ।

विज्ञप्तिमा चर्को गर्मी, पानीको अभाव, हैजाको महामारी र पछिल्लो जेन्जी आन्दोलनका कारण शिक्षा क्षेत्र अस्तव्यस्त भएको उल्लेख गर्दै अब यस अवस्थालाई लम्ब्याउनु विद्यार्थीहरूको भविष्यमाथिको अन्याय हुने ठहर गरिएको छ।

प्याब्सनले पर्सा जिल्लाका सम्पूर्ण सरोकारवाला, नागरिक समाज, अभिभावक, पत्रकार, शिक्षक र सम्पूर्ण जनसमुदायलाई बालबालिकाको शिक्षाको मौलिक हकको संरक्षण गर्दै शिक्षण–सिकाइ क्रियाकलापलाई तत्काल पुनः सञ्चालन गर्न ठोस पहल गर्न आह्वान गरेको छ।

प्रकाशित मिति: शनिबार, भदौ २८, २०८२ १४:०१

प्रतिक्रिया दिनुहोस्