बिटानिया नेपाल प्रा.लि.मा ओमप्रकाश शाह कलवार पुनः सर्वसम्मत अध्यक्ष निर्वाचित

राजनीति

गृहपृष्ठ
राजनीति

बिटानिया नेपाल प्रा.लि.मा ओमप्रकाश शाह कलवार पुनः सर्वसम्मत अध्यक्ष निर्वाचित

choicekhabar बिहीबार, असोज २, २०८२

नेकपा एमाले निकट संगठन समग्र उद्योग ट्रेड यूनियन नेपाल अन्तर्गतको बिटानिया नेपाल प्रा. लि. कम्पनीमा आयोजित साधारणसभाले दोस्रो कार्यकालका लागि ओमप्रकाश शाह कलवारलाई सर्वसम्मत अध्यक्षमा पुनः निर्वाचित गरेको छ।

कार्यक्रममा उपस्थित श्रमिक, कर्मचारी तथा उद्योग प्रतिनिधिहरूको सहभागितामा सम्पन्न निर्वाचन प्रक्रियामा कलवारको नेतृत्वमा बनेको कार्यसमिति सर्वसम्मत रूपमा अनुमोदन गरिएको थियो। यसपटकको नयाँ कार्यसमितिमा अध्यक्षसहित ९ जना पदाधिकारी चयन भएका छन्। समितिमा युवा पुस्तादेखि अनुभवी कार्यकर्तासम्मको समावेश गरिएका कारणले संगठन अझ सबल र सशक्त हुने अपेक्षा गरिएको छ।

निर्वाचन पश्चात आयोजित विशेष कार्यक्रममा नव–निर्वाचित पदाधिकारीहरूलाई औपचारिक रूपमा माल्यार्पण, अबिर लगाइ स्वागत तथा सम्मान गरिएको थियो। कार्यक्रममा वक्ताहरूले श्रमिक वर्गको अधिकार रक्षा, तलब–सुविधा सुनिश्चितता र कार्यस्थलमा हुने समस्या समाधानका लागि संगठन निरन्तर सक्रिय रहने विश्वास व्यक्त गरे।

पुनः निर्वाचित अध्यक्ष कलवारले आफ्नो छोटो सम्बोधनमा विगतको कार्यकालमा संगठनलाई सबल बनाउन गरेका पहल र उपलब्धिहरूको स्मरण गर्दै आगामी दिनमा अझै प्रभावकारी काम गर्ने प्रतिबद्धता जनाउनुभयो। उहाँले उद्योग क्षेत्रमा कार्यरत प्रत्येक श्रमिकको हकहित सुनिश्चित गर्न कानूनी, सामाजिक तथा संगठनात्मक स्तरमा निरन्तर पहल गर्ने बताउनुभयो। साथै, श्रमिक–प्रशासनबीच आपसी सहकार्य र संवादलाई प्राथमिकता दिने, संगठनलाई अझ अनुशासित बनाउने र सबै सदस्यको सक्रिय सहभागिता सुनिश्चित गर्ने योजना समेत प्रस्तुत गर्नुभयो।

कार्यक्रममा विभिन्न उद्योग ट्रेड यूनियनका प्रतिनिधि, स्थानीय सरोकारवालाहरू र श्रमिकहरूको उल्लेखनीय उपस्थिति रहेको थियो। सहभागीहरूले दोस्रो कार्यकालका लागि पुनः नेतृत्व पाउनुभएकोमा अध्यक्ष कलवारलाई शुभकामना दिँदै आगामी कार्यकाल श्रमिक वर्गका लागि अझ उपलब्धिमूलक होस् भन्ने अपेक्षा व्यक्त गरेका थिए।

प्रकाशित मिति: बिहीबार, असोज २, २०८२ १७:५९

प्रतिक्रिया दिनुहोस्