अदालतको आदेश विपरीत कलैयामा निजी घर डोजर लगाएर भत्काइयो

समाचार

गृहपृष्ठ
समाचार

अदालतको आदेश विपरीत कलैयामा निजी घर डोजर लगाएर भत्काइयो

choicekhabar मंगलबार, असोज ७, २०८२

बाराको कलैया नगरपालिकाले अदालतको आदेशविपरीत व्यक्तिको निजी घर डोजर लगाएर भत्काएको छ । कलैया उपमहानगरपालिका–१ का शेषनन्दन प्रसाद साह कानुको घर सोमबार सडक उपमहानगरले बलपूर्वक तोडफोड गरेको हो ।

पीडितका अनुसार सडक विस्तारको क्रममा एकतर्फ मात्र निजी सम्पत्तिबाट घर भत्काउन सूचना जारी तथा वडाध्यक्ष मोहनबहादुर क्षेत्रीले चेतावनी दिएका थिए । त्यसपछि कानु उच्च अदालत वीरगञ्जमा उपमहानगरविरुद्ध भदौ २९ गते रिट निवेदन दिएका थिए ।

रिटउपर सुनुवाइ गर्दै पुर्णेश्वरप्रसाद उपाध्यायको एकल इजलासले असोज २ गते विपक्षीहरुको नाममा अन्तरिम आदेश जारी गरेको थियो । निवेदनको अन्तिम टुंगो नलागेसम्म धनीको मन्जुरी विना कुनै किसिमको हस्तक्षेप नगर्न आदेशमा उल्लेख छ ।

अदालतको आदेश लिएर कानु निवेदनसहित असोज ५ गते उपमहानगरपालिकामा पुगेका थिए । कानुका छोरा कुन्दन गुप्ताका अनुसार उनका बुबा कानुन निवेदन लिएर पुग्दा दर्ता गरेनन् । सोमबार विहान पनि मेयर विनोद साहसमक्ष पुगेपछि अदालतको आदेश आइसकेकाले नभत्काउने आश्वासन दिएका थिए । तर, दिउँसो साढे १२ बजे नगरप्रहरी र डोजरसमेत लिएर घर भत्काएर क्षति पुर्‍याएको पीडित गुप्ताले बताए ।

‘अदालतको आदेश देखाउँदा देखाउँदै पनि मेरो घर भत्कायो । मेयरलाई फोन गरेर तोडफोड गरिरहेको गुनासो गर्दा अदालतको आदेशले केही हुनेबाला छैन जवाफ दिनुभयो । प्रहरीलाई फोन गरेर जानकारी गराउँदा आएनन्’, उनले भने ‘यो त अदालतको अब्हेलना र हाम्रो परिवारमाथि अन्याय हो ।’

उनले हेल्लो सरकारमा उपमहानगरमाथि उजुरी दिएका छन् । यस विषयमा मेयर साहसँग बुझ्न खोज्दा उनले फोन उठाएनन् ।

प्रकाशित मिति: मंगलबार, असोज ७, २०८२ १०:३४

प्रतिक्रिया दिनुहोस्