इलाममा हालसम्मकै ठूलो मानवीय क्षति, पहिरोमा २८ जनाको मृत्यु

समाचार

गृहपृष्ठ
समाचार

इलाममा हालसम्मकै ठूलो मानवीय क्षति, पहिरोमा २८ जनाको मृत्यु

choicekhabar आइतबार, असोज १९, २०८२

अविरल वर्षासँगै गएको पहिरोले इलाममा अहिलेसम्मकै सबैभन्दा ठूलो जनधनको क्षति भएको छ । विभिन्न स्थानमा घर पुरिँदा २८ जनाको ज्यान गएको पुष्टि भएको हो ।

सशस्त्र प्रहरी बलले संकलन गरेको विवरणअनुसार, सूर्योदय नगरपालिका–१ मा ५, इलाम नगरपालिका–१ मा ६, देउमाईमा २, फाकफोकथुममा १, मान्सेबुङमा ३, माइजोगमाईमा ८ र सन्दकपुरमा ३ जनाको मृत्यु भएको छ ।

अविरल वर्षाका कारण पहिरोले बस्तीमा प्रवेश गरी घरहरू पुरिँदा यतिधेरै मानवीय क्षति भएको हो । प्रभावित क्षेत्रमा प्रहरी, सशस्त्र प्रहरी र नेपाली सेनाले उद्धार कार्य तीव्र पारेका छन् । घाइतेहरूलाई हेलिकप्टरमार्फत उपचारका लागि अन्यत्र लैजाने काम भइरहेको छ ।

पहिचान भएका मृतकमध्ये सूर्योदय नगरपालिका–१ निवासी करिब ६०–६५ वर्षीया मनमाया क्षेत्री र ११ वर्षीया रश्मिका क्षेत्री छन् । त्यस्तै, पहिचान नखुलेका करिब ४०–४५ वर्षीया एक महिला र १५–१६ वर्षीया एक बालिकाको पनि मृत्यु भएको छ ।

इलाम नगरपालिका–६ का २३ वर्षका समिर देउसाली, २३ वर्षीय प्रविन पाख्रिन र २३ वर्षीय विराज पाख्रिन पहिरोमा ज्यान गुमाउनेमा परेका छन् । त्यस्तै, ३२ वर्षीया अनु तामाङ, ३२ वर्षीया प्रनिशिका मगर र ४ वर्षीया आरुष दनुवारको पनि मृत्यु भएको इलाम प्रहरीले जनाएको छ ।

सुरक्षा निकायका अनुसार अझै केही व्यक्ति हराइरहेका छन् र खोजतलास तथा उद्धार कार्य निरन्तर भइरहेको छ । लगातार वर्षाका कारण केही ठाउँमा पुग्न कठिनाइ भइरहेको भए पनि उद्धार टोली जोखिम मोल्दै काम गरिरहेका छन् ।

प्रकाशित मिति: आइतबार, असोज १९, २०८२ १३:२९

प्रतिक्रिया दिनुहोस्