बाढीपहिरोका कारण तीन प्रदेशका मुख्य नौ राजमार्गहरु अवरुद्ध

समाचार

गृहपृष्ठ
समाचार

बाढीपहिरोका कारण तीन प्रदेशका मुख्य नौ राजमार्गहरु अवरुद्ध

choicekhabar बिहीबार, असोज २३, २०८२

देशका विभिन्न ठाउँमा परेको वर्षाका कारण बाढीपहिरो जाँदा तीन प्रदेशका नौ मुख्य राजमार्ग अवरुद्ध भएको छ। प्रहरी प्रधान कार्यालयले दिएको जानकारी अनुसार वर्षाका कारण कोशी, वाग्मती र कर्णाली प्रदेशका नौ राजमार्ग अवरुद्ध भएका हुन्।

अवरुद्ध हुनेमा सङ्खुवासभाको भोटखोला गाउँपालिका वडा नं ४ वरुणखोलास्थित कोशी राजमार्ग र सोही जिल्लाको मकालु गाउँपालिका वडा नं ३ एकुवास्थित कोशी राजमार्ग अवरुद्ध भएका छन्।

यस्तै बाढीपहिराले इलामको इलाम नगरपालिका वडा नं ९ राजदुवालीस्थित मेची राजमार्ग र पाँचथरको पाँचथर तुम्बेवा गाउँपालिका वडा नं २ नावाखोलास्थित तमोर करिडोर समेत अवरुद्ध भएको प्रहरी केन्द्रीय प्रवक्ता, प्रहरी नायव महानिरीक्षक विनोद घिमिरेले बताए।

यस्तै रसुवाको गोसाइँकुण्ड गाउँपालिका वडा नं २ स्थित पासाङ ल्हामु सडक खण्ड, काभ्रेपलाञ्चोकको रोशी गाउँपालिका वडा नं ११ माम्तीखोलास्थित वीपी राजमार्ग र सिन्धुलीको सुनकोशी गाउँपालिका वडा नं १ नेपालथोकस्थित वीपी राजमार्गसमेत अवरुद्ध भएको छ।

यस्तै हुम्लाको खार्पुनाथ गाउँपालिका वडा नं ५ कुरिल्लास्थित कर्णाली करिडोर र कालिकोटको पचालझरना गाउँपालिका वडा नं ८ जुगेनीखोलास्थित कर्णाली करिडोर समेत पूर्ण अवरुद्ध भएको प्रहरी प्रवक्ता घिमिरेले बताए।

वर्षाका कारण धनकुटाको साँगुरीगढी गाउँपालिका वडा नं १ स्थित कोशी लोकमार्ग, मकवानपुरको भीमफेदी गाउँपालिका वडा नं ८ बगुवाखोलास्थित कान्ति लोकपथ सडक र मकवानपुरकै बकैया गाउँपालिका वडा नं ११ घट्टेपाखास्थित कान्ति लोकपथ एकतर्फी रूपमा सञ्चालनमा आएको प्रहरीले जनाएको छ।

प्रकाशित मिति: बिहीबार, असोज २३, २०८२ १२:१३

प्रतिक्रिया दिनुहोस्