पर्सा र बारामा हैजा खोप अभियानले पकड बनायो, ७१ प्रतिशत लक्षित जनसंख्या भ्याक्सिन गराइयो

समाचार

गृहपृष्ठ
समाचार

पर्सा र बारामा हैजा खोप अभियानले पकड बनायो, ७१ प्रतिशत लक्षित जनसंख्या भ्याक्सिन गराइयो

choicekhabar शनिबार, कात्तिक १, २०८२

पर्सा र बारामा हैजा विरुद्धको खोप अभियान प्रभावकारी रूपमा अघि बढिरहेको स्वास्थ्य अधिकारीहरूले बताएका छन्। नेपाल सरकार स्वास्थ्य तथा जनसङ्ख्या मन्त्रालयका अनुसार हालसम्म कुल लक्षित जनसङ्ख्याको ७१ प्रतिशतले खोप लगाइसकेका छन्, जसले अभियान सफलतापूर्वक अगाडि बढिरहेको संकेत गरेको छ।

स्वास्थ्य सेवा विभाग अन्तर्गत बाल स्वास्थ्य तथा खोप शाखाका प्रमुख अभियान गौतमका अनुसार दुवै जिल्लामा गरी १० लाख १८ हजार ६० जनालाई लक्षित गर्दै अभियान सञ्चालन गरिएको हो। तीमध्ये ७ लाख २३ हजार ८३६ जनाले खोप लगाइसकेका छन्।

पर्सा जिल्लामा असोज २६ गतेदेखि अभियान सुरु गरिएको थियो। छैटौं दिनसम्म ६ लाख ५२ हजार १२९ लक्षितमध्ये ४ लाख ५६ हजार ७७८ जनाले खोप लगाइसकेका छन्। पर्साका सबै स्थानीय तहमा अभियान सञ्चालन गरिँदै आएको छ।

बारामा असोज २७ गतेदेखि अभियान सुरु गरिएको हो। बाराका सीमा नजिकका ६ वटा पालिकामा लक्षित ३ लाख ६५ हजार ९३१ जनामध्ये २ लाख ६७ हजार ५८ जनाले खोप लगाइसकेका छन्।

हैजा महामारीको जोखिम कम गर्नका लागि पर्सा जिल्लाका सबै पालिका र बाराका जोखिमयुक्त क्षेत्रका पालिकामा खोप कार्यक्रम सञ्चालन गरिएको हो। डा। गौतमका अनुसार अभियान भोलिसम्म निरन्तर चल्नेछ र बाँकी जनसङ्ख्यालाई खोप पहुँच पुर्‍याउन स्वास्थ्यकर्मीहरू सक्रिय छन्।

स्वास्थ्य मन्त्रालयले खोप अभियानलाई अझ तीव्र पार्दै नागरिकलाई थप प्रोत्साहित गर्ने रणनीति बनाएको जनाएको छ। मन्त्रालयका अनुसार स्थानीय तह, स्वयंसेवक र स्वास्थ्य संस्थाको सहकार्यमा जनचेतनामूलक गतिविधि समेत सञ्चालन गरिएको छ।

हैजा नियन्त्रणका लागि खोप अभियानसँगै सुरक्षित खानेपानी, सरसफाइ सुधार र सचेतनामूलक कार्यक्रमलाई पनि समानान्तर रूपमा अघि बढाइएको छ। स्वास्थ्य अधिकारीहरूका अनुसार खोप अभियानले जोखिमग्रस्त समुदायमा रोग फैलिनबाट रोकथाममा ठूलो भूमिका खेल्ने अपेक्षा गरिएको छ।

प्रकाशित मिति: शनिबार, कात्तिक १, २०८२ १७:१९

प्रतिक्रिया दिनुहोस्