ललितपुरमा स्कुटर ठक्कर दिएर महिलाको सुनको सिक्री लुट्ने समूहका एक सदस्य पक्राउ

समाचार

गृहपृष्ठ
समाचार

ललितपुरमा स्कुटर ठक्कर दिएर महिलाको सुनको सिक्री लुट्ने समूहका एक सदस्य पक्राउ

choicekhabar बुधबार, कात्तिक २६, २०८२

काठमाडौँ । ललितपुरको जावलाखेल स्थित चिडियाखाना नजिकै भीमकुमारी सिर्पालीलाई अपरिचित स्कुटर चालकले ठक्कर दिए । बागलुङको बुर्तिवाङ घर भएर काठमाडौँ–१४ बस्ने बस्ने ३७ वर्षीया सिर्पाली स्कुटरबाट लडिन् । उनी उठ्न खोज्दै थिइन्, दुईवटा स्कुटरबाट चारजना युवकहरू झरेर उनको गलाबाट सिक्री चुँडाले । अनि, फरार भए ।

सिर्पाली बा.५२ प १३९२ नम्बरको स्कुटरमा सवार थिइन् । उनले करिब ११ लाख मूल्य पर्ने सिक्री लुटपाट भएको प्रहरीलाई बताएकी छन् । असोज ५ मा भएको सो लुटमा संलग्न दुईजनालाई पक्राउ गरिएको जिल्ला प्रहरी परिसर ललितपुरका एसएसपी होबिन्द्र बोगटीले बताए ।

पक्राउ पर्नेमा काभ्रेको रोशी गाउँपालिका–७ घर भएर ललितपुरको ठैव बस्ने ३० वर्षीय गंगे बहादुर तामाङ र सिन्धुपाल्चोक घर भएका ३३ वर्षीय विनय तामाङ छन् । उपत्यका अपराध अनुसन्धान कार्यालय र जिल्ला प्रहरी परिसर ललितपुरको टोलीले उनीहरूलाई पक्राउ गरेको हो ।

आरोपी गंगे बहादुर तामाङ बा। ९३ प ३७६७ नम्बरको स्कुटरमा सवार थिए । लुटमा प्रयोग भएको सो स्कुटर प्रहरीले बरामद गरेको छ ।

सिन्धुपाल्चोकको बलेफी घर भएका विनय चाहिँ जेनजी प्रदर्शनमा नख्खु कारागारबाट भागेको भेटिएको छ । भदौ २४ मा भागेका तामाङ फेरी लुटमा संलग्न भएको भेटिएको जिल्ला प्रहरी परिसर ललितपुरका एसपी चक्रराज जोशीले जानकारी दिए । उनले भने, ‘विनयलाई हामीले नख्खु कारागारमा बुझाएका छौं ।’

आरोपीहरू भदौ २४ मा पक्राउ परेका हुन् । गंगे बहादुर तामाङलाई प्रहरीले अदालतबाट म्याद लिएर अनुसन्धान गरिरहेको छ । लुटमा ५ जना संलग्न रहेको अनुसन्धानमा संलग्न अधिकृतहरू बताउँछन् ।

प्रकाशित मिति: बुधबार, कात्तिक २६, २०८२ १२:०२

प्रतिक्रिया दिनुहोस्