कांग्रेस संस्थापन पक्षका कार्यवाहक सभापतिद्वारा पत्रकार सम्मेलन, आधिकारिकता विवादमा स्पष्ट धारणा

समाचार

गृहपृष्ठ
समाचार

कांग्रेस संस्थापन पक्षका कार्यवाहक सभापतिद्वारा पत्रकार सम्मेलन, आधिकारिकता विवादमा स्पष्ट धारणा

choicekhabar शुक्रबार, माघ २, २०८२

काठमाडौँ । नेपाली कांग्रेसभित्रको आन्तरिक कलह वारपारको अवस्थामा पुगेको बेला संस्थापन पक्षले आफ्नो आधिकारिक धारणा सार्वजनिक गर्ने भएको छ । पार्टीका कार्यवाहक सभापति पूर्णबहादुर खड्काले आज दिउँसो २ बजे पार्टी केन्द्रीय कार्यालय सानेपामा विशेष पत्रकार सम्मेलन आयोजना गर्दै छन् ।

भृकुटीमण्डपमा भएको विशेष महाधिवेशनबाट महामन्त्रीद्वय गगन थापा र विश्वप्रकाश शर्माको नेतृत्वमा नयाँ कार्यसमिति घोषणा गरिएपछि संस्थापन पक्षले यसलाई गम्भीरतापूर्वक लिएको छ । पत्रकार सम्मेलनमा विशेष गरी गगन विश्व समूहले गरेको ‘विद्रोह’, नयाँ कार्यसमिति घोषणाको वैधानिकता र यसले पार्टीको आगामी राजनीतिक यात्रामा पार्ने प्रभावबारे कार्यवाहक सभापति खड्काले स्पष्ट पार्ने बुझिएको छ ।

पार्टीका मुख्य सचिव कृष्णप्रसाद पौडेलका अनुसार, सम्मेलनमा पछिल्ला पार्टी गतिविधि, आसन्न निर्वाचनको तयारी र पार्टीभित्र देखिएको असाधारण परिस्थितिबारे सञ्चारकर्मीहरूलाई जानकारी दिइनेछ ।

यसअघि नै संस्थापन पक्षले महामन्त्रीद्वय थापा र शर्मालाई अनुशासनको कारबाही गर्ने चेतावनी दिइसकेको पृष्ठभूमिमा आजको पत्रकार सम्मेलनलाई अर्थपूर्ण रूपमा हेरिएको छ । विशेष महाधिवेशन पक्षधरले नयाँ नेतृत्व चयन गरी निर्वाचन आयोगमा गएपनि संस्थापन पक्षले भने यसलाई ‘अवैधानिक’ ठहर गर्दै आएको छ ।

कार्यवाहक सभापति खड्काले आजको सम्बोधनमार्फत पार्टी एकजुट रहेको सन्देश दिने प्रयास गर्ने कि कारबाहीको थप प्रक्रिया अघि बढाउने भन्नेमा सबैको चासो केन्द्रित छ । पत्रकार सम्मेलनमा पार्टीका अन्य शीर्ष नेताहरूको पनि उपस्थिति रहने बताइएको छ ।

प्रकाशित मिति: शुक्रबार, माघ २, २०८२ ११:२२

प्रतिक्रिया दिनुहोस्