पर्सा–१ मा रास्वपा उम्मेदवार हरि पन्तको घरदैलो तीव्र, पिपरा र भेडियाहीमा उत्साहपूर्ण जनसमर्थन

राजनीति

गृहपृष्ठ
राजनीति

पर्सा–१ मा रास्वपा उम्मेदवार हरि पन्तको घरदैलो तीव्र, पिपरा र भेडियाहीमा उत्साहपूर्ण जनसमर्थन

choicekhabar आइतबार, माघ २५, २०८२

वीरगञ्ज । प्रतिनिधिसभा निर्वाचन नजिकिँदै गर्दा पर्सा क्षेत्र नम्बर १ मा राष्ट्रिय स्वतन्त्र पार्टी (रास्वपा) का उम्मेदवार हरि पन्तले घरदैलो अभियानलाई तीव्र बनाएका छन्। अभियान अन्तर्गत उनले पिपरा, लालपर्सा, भेडियाही तथा सोलखपुर क्षेत्रका मतदातासँग प्रत्यक्ष भेटघाट गर्दै जनताका सरोकार र समस्याबारे जानकारी लिएका छन्।

घरदैलोका क्रममा स्थानीयवासीले उम्मेदवार पन्तलाई ठाउँ–ठाउँमा टीका, माला र खादा अर्पण गर्दै भव्य स्वागत गरेका थिए। भेटघाटमा सहभागी मतदाताहरूले अहिलेको राजनीतिक अवस्थाप्रति निराशा व्यक्त गर्दै परिवर्तनका लागि रास्वपा नै उपयुक्त विकल्प भएको धारणा राखेका छन्। यसपटक पर्सा–१ बाट घण्टी चिह्नलाई विजयी गराएर नयाँ सुरुवात गर्ने प्रतिबद्धता पनि उनीहरूले जनाएका छन्।

स्थानीय नागरिकसँगको संवादमा विकास निर्माण, शिक्षा, स्वास्थ्य सेवा र रोजगारीका अवसर जस्ता विषय प्रमुख रूपमा उठेका थिए। उम्मेदवार पन्तले ती गुनासाहरूलाई गम्भीरतापूर्वक सुन्दै जनताको अपेक्षाअनुसार काम गर्ने प्रतिबद्धता व्यक्त गरे। उनले पुराना राजनीतिक दलहरूको विकल्पका रूपमा रास्वपाले स्पष्ट एजेन्डा र दीर्घकालीन दृष्टिकोणसहित काम गर्ने बताए।

घरदैलो कार्यक्रममा रास्वपाका नेता तथा कार्यकर्तासँगै युवा, महिला र सर्वसाधारणको उल्लेखनीय सहभागिता देखिएको थियो। पर्सा–१ मा रास्वपाको बढ्दो गतिविधि र जनआकर्षणले निर्वाचन प्रतिस्पर्धा थप चासोपूर्ण बन्दै गएको देखिन्छ।

प्रकाशित मिति: आइतबार, माघ २५, २०८२ १०:५५

प्रतिक्रिया दिनुहोस्