मौसमको जोखिम बढेपछि पर्सा प्रहरीद्वारा व्यापक सचेतना अभियान

समाज

गृहपृष्ठ
समाज

मौसमको जोखिम बढेपछि पर्सा प्रहरीद्वारा व्यापक सचेतना अभियान

choicekhabar बुधबार, वैशाख १६, २०८३

बदलिँदो मौसमसँगै हावाहुरी, आगलागी तथा चट्याङका घटना बढ्न सक्ने जोखिमलाई मध्यनजर गर्दै जिल्ला प्रहरी कार्यालय पर्साले व्यापक सचेतना अभियान सञ्चालन गरेको छ।

जल तथा मौसम विज्ञान विभागअन्तर्गत मौसम पूर्वानुमान महाशाखाले विशेष सूचना जारी गरेपछि पर्सा प्रहरी सक्रिय बनेको हो। जिल्ला प्रहरी कार्यालय पर्साले आफ्ना ६४ वटा युनिटमार्फत ग्रामीण तथा शहरी क्षेत्रमा माइकिङ गर्दै सर्वसाधारणलाई सम्भावित जोखिमबारे सचेत गराइरहेको जनाएको छ।

जिल्ला प्रहरी कार्यालय पर्साका प्रहरी उपरीक्षक सुदीप राज पाठकको निर्देशनमा विभिन्न गाउँबस्तीमा हावाहुरी, चट्याङ तथा आगलागीबाट बच्न आवश्यक सावधानी अपनाउन आग्रह गरिएको छ।

महाशाखाले आज बिहान ८ बजे जारी गरेको विशेष बुलेटिनअनुसार आज अपराह्न ४ बजेदेखि देशका विभिन्न भागमा तीव्र हावाहुरी सुरु भई भोलि बिहान ६:४५ बजेसम्म जारी रहने पूर्वानुमान गरिएको छ। उक्त प्रणालीको प्रभाव विशेषगरी मधेश प्रदेशका बारा, पर्सा र धनुषा जिल्लासहित सुदूरपश्चिम प्रदेशका कञ्चनपुर, डडेलधुरा र डोटी क्षेत्रमा पर्ने सम्भावना रहेको जनाएको छ।

प्रहरीले सर्वसाधारणलाई सम्भावित जोखिमबाट जोगिन सुरक्षित स्थानमा बस्न, खुला ठाउँमा नबस्न तथा आवश्यक सतर्कता अपनाउन अनुरोध गरेको छ। साथै आकस्मिक अवस्थामा नजिकको प्रहरी कार्यालयमा सम्पर्क गर्न पनि आग्रह गरिएको छ।

प्रकाशित मिति: बुधबार, वैशाख १६, २०८३ १७:२२

प्रतिक्रिया दिनुहोस्