वीरगंजमा सडक विस्तारबाट प्रभावित स्थानीयको समस्या बारे मानवअधिकार आयोगको ध्यानाकर्षण

समाज

गृहपृष्ठ
समाज

वीरगंजमा सडक विस्तारबाट प्रभावित स्थानीयको समस्या बारे मानवअधिकार आयोगको ध्यानाकर्षण

choicekhabar बुधबार, वैशाख ३०, २०८३

वीरगंजमा सडक विस्तारका क्रममा भइरहेको घरटहरा हटाउने कार्य र त्यसबाट स्थानीय बासिन्दामा परेको असरबारे वीरगञ्ज युवा तथा व्यापारी सडक पीडित संघर्ष समितिले राष्ट्रिय मानव अधिकार आयोगको ध्यानाकर्षण गराएको छ ।

समितिका संयोजक कुन्दन रौनियारको नेतृत्वमा गएको प्रतिनिधिमण्डलले आयोगका पदाधिकारीसँग भेट गरी प्रभावित नागरिकहरूको अवस्थाबारे जानकारी गराएको हो ।

रौनियारका अनुसार २०८१ वैशाख ८ गते ललितपुरस्थित आयोगमा २५२८ नम्बरमा निवेदन दर्ता गरिएको थियो । त्यसपछि आयोगले जनकपुरबाट टोली खटाई वीरगञ्जमा स्थलगत अध्ययन गरेको र हाल त्यससम्बन्धी प्रतिवेदन तयार पार्ने काम भइरहेको जनाएको उनले बताए ।

उनले आयोगले छिट्टै वास्तविक अवस्थाबारे सार्वजनिक प्रतिवेदन ल्याउने अपेक्षा गरिएको पनि उल्लेख गरे ।

संयोजक रौनियारले सडक विस्तारका क्रममा घर भत्काइएपछि स्थानीयहरू गम्भीर मानसिक तनावमा परेको दाबी गरे । उनका अनुसार तनावकै कारण हालसम्म चार जनाको हृदयाघातबाट मृत्यु भएको तथा धेरैजना मानसिक स्वास्थ्य समस्याबाट प्रभावित भएका छन् ।

त्यसैगरी, घर टुटफुट भएपछि बालबालिका विद्यालय जान नसकेको, धेरै परिवार जोखिमपूर्ण अवस्थामा बस्न बाध्य भएको तथा आम्दानी घट्दा उपचार खर्च जुटाउन कठिनाइ भएको उनले बताए । विशेषगरी मिर्गौला रोगीहरू आर्थिक अभावका कारण नियमित डायलासिस गर्नसमेत समस्या भोग्न बाध्य भएको उनको भनाइ छ ।

संघर्ष समितिले सडक विस्तारको प्रक्रिया गैरन्यायिक र अव्यवस्थित ढंगले अघि बढाइएको आरोप लगाउँदै प्रभावित नागरिकलाई उचित क्षतिपूर्ति, पुनःस्थापना र मानवीय व्यवहारको माग गरेको छ ।

यसैबीच, उक्त विषयमा सर्वोच्च अदालतमा दायर मुद्दाको पेशी बुधबारका लागि तोकिएको जानकारी पनि दिइएको छ ।

स्थानीयवासीहरूले विकासका नाममा नागरिकको आधारभूत अधिकार हनन हुन नहुने भन्दै सम्बन्धित निकायलाई संवेदनशील भएर समस्या समाधान गर्न आग्रह गरेका छन् ।

प्रकाशित मिति: बुधबार, वैशाख ३०, २०८३ १६:१९

प्रतिक्रिया दिनुहोस्