समाचारकै कारण सञ्चारकर्मीमाथि धम्की र दुव्र्यवहार, पक्राउको मागसहित यात्राडेलीको उजुरी

समाचार

गृहपृष्ठ
समाचार

समाचारकै कारण सञ्चारकर्मीमाथि धम्की र दुव्र्यवहार, पक्राउको मागसहित यात्राडेलीको उजुरी

choicekhabar बुधबार, असार ३, २०८३

समाचार प्रकाशन गरेकै कारण सञ्चारकर्मी माथि धम्की, दुव्र्यवहार र मानसिक दबाब सिर्जना गरिएको आरोप लगाउँदै यात्रा डेली प्रालिले जिल्ला प्रहरी कार्यालय पर्सामा उजुरी दर्ता गरेको छ। संस्थाले हेयर ट्याग सैलुनसँग आबद्ध व्यक्तिहरू, विशेषगरी हरिकिशोर साहलाई पक्राउ गरी कानुनी कारबाही गर्न माग गरेको छ।

असार २ गते प्रकाशित “वीरगञ्जका चार ब्युटी पार्लरमाथि कारबाही” शीर्षकको समाचारप्रति असन्तुष्टि जनाउँदै करिब ८–१० जनाको समूह कार्यालयमा प्रवेश गरी गालीगलौज तथा दुव्र्यवहार गर्नुका साथै सञ्चारकर्मीमाथि आक्रमणको प्रयाससमेत गरेको यात्रा डेलीका संचालक राम सर्राफले बताए ।

सर्राफका अनुसार समाचारमा आफ्नो सैलुनको नाम उल्लेख गरिएको विषयलाई लिएर हरिकिशोर साहसहितका व्यक्तिहरू कार्यालयमा पुगेका थिए र सञ्चारकर्मी तथा कर्मचारीमाथि धम्कीपूर्ण व्यवहार गरेका थिए।

उजुरीमा पटक–पटक फोनमार्फत समाचार हटाउन दबाब दिने, कार्यालयमै पुगेर धम्की दिने तथा कुटपिटको धम्की दिने जस्ता कार्य भएको दाबी गरिएको छ। साथै अन्य व्यक्तिहरूसहित कार्यालय परिसरमै उपस्थित भई त्रास सिर्जना गरिएको उल्लेख छ।

यात्रा डेलीले घटनापछि प्रहरीमा उजुरी दर्ता गर्दै दोषीमाथि कानुनी कारबाही, संलग्न व्यक्तिको पक्राउ तथा पत्रकार र कर्मचारीको सुरक्षाको प्रत्याभूति माग गरेको छ। जिल्ला प्रहरी कार्यालय पर्साका सूचना अधिकारी प्रहरी नायब उपरीक्षक हरि बहादुर बस्नेतका अनुसार उजुरी दर्ता गरी घटनामा संलग्न व्यक्तिहरूको खोजी सुरु गरिएको छ। उहाँले समाचारप्रति असन्तुष्टि भए कानुनी बाटो अपनाउनुको सट्टा धम्की र दुव्र्यवहार गर्नु गलत भएको प्रतिक्रिया दिनुभएको छ।

प्रकाशित मिति: बुधबार, असार ३, २०८३ १८:५६

प्रतिक्रिया दिनुहोस्