मिटरब्याज पीडित भेट्न निजगढ पुगे गृहमन्त्री, बास बसेकै सभाहलमा छलफल

समाचार

गृहपृष्ठ
समाचार

मिटरब्याज पीडित भेट्न निजगढ पुगे गृहमन्त्री, बास बसेकै सभाहलमा छलफल

choicekhabar मंगलबार, असार ३०, २०८३

३० असार, काठमाडौँ । काठमाडौंसम्मको लामो र कष्टकर ‘पैदल न्याय मार्च’ तय गरेर जनकपुरधामबाट हिँडेका मिटरब्याज पीडितहरूलाई भेट्न गृहमन्त्री सुधन गुरुङ आफैँ बाराको निजगढ आइपुगेका छन् ।

आफ्ना पीडा र मागहरू सरकारसमक्ष राख्न हिँडेका पीडितहरू र गृहमन्त्रीबीच निजगढमा अहिले घनिभूत संवाद चलिरहेको छ ।बिहानै गृहमन्त्री आफूहरूलाई भेट्न आउँदै गरेको सूचना पाएपछि काठमाडौंतर्फ अघि बढिरहेका पीडितहरूको टोली निजगढमै रोकिएको थियो ।

गएराति बास बसेकै स्थान— उद्योग वाणिज्य संघ निजगढको सभाहलमा गृहमन्त्री र पीडितहरू आमनेसामने बसेर छलफल गरिरहेका छन् ।मिटरब्याजीहरूको चक्रव्यूहबाट मुक्ति र न्यायको खोजीमा सडकमा उत्रिएका नागरिकका पीडा सुन्न गृहमन्त्री आफैँ बाटोमै आइपुग्नुलाई अर्थपूर्ण रूपमा हेरिएको छ ।

मिटरब्याज पीडित संघर्ष समितिका नेता मनोज पासवानका अनुसार, अहिले टोलीसँग माग तथा समस्या समाधानका विविध विकल्प र योजनाबारे सौहार्दपूर्ण तरिकाले छलफल भइरहेको छ ।

सडकको धुलो र पैदल यात्राको थकाइबीच न्यायको मधुरो आशा बोकेका पीडितहरू गृहमन्त्रीसँगको यो प्रत्यक्ष संवादबाट ठोस निकास निस्कनेमा आशावादी देखिएका छन् ।

प्रकाशित मिति: मंगलबार, असार ३०, २०८३ ११:२१

प्रतिक्रिया दिनुहोस्