‘इक्विटी ट्याक्सले शिक्षा महँगो बनाउँछ’ : जियालाल गुप्ता

स्वास्थ्य/शिक्षा

गृहपृष्ठ
स्वास्थ्य/शिक्षा

‘इक्विटी ट्याक्सले शिक्षा महँगो बनाउँछ’ : जियालाल गुप्ता

choicekhabar सोमबार, साउन ४, २०८३

सरकारले आर्थिक वर्ष २०८३/८४ को बजेटमार्फत निजी शैक्षिक संस्थामा ३ प्रतिशत शिक्षा समानता सेवा शुल्क (इक्विटी ट्याक्स) लागू गर्ने निर्णयप्रति नेशनल प्याब्सन (एन–प्याब्सन) वीरगञ्ज महानगर समितिले असन्तुष्टि जनाएको छ। समितिका अध्यक्ष जियालाल गुप्ताले उक्त कर लागू भए विद्यार्थी र अभिभावकमाथि थप आर्थिक भार पर्ने बताएका छन्।
अध्यक्ष गुप्ताले शिक्षा क्षेत्रमा थप कर लगाउने सरकारी निर्णय व्यावहारिक नभएको उल्लेख गर्दै यसको प्रत्यक्ष असर विद्यालयको शुल्कमा पर्ने बताए। उनका अनुसार विद्यालयले अतिरिक्त करको भार धान्न नसक्दा अन्ततः शुल्क वृद्धि गर्नुपर्ने अवस्था सिर्जना हुने र त्यसको मार अभिभावकले नै व्यहोर्नुपर्नेछ।
“३ प्रतिशत शिक्षा समानता सेवा शुल्क विद्यार्थी र अभिभावकको हितमा छैन। यो कर लागू भए विद्यालयले अतिरिक्त शुल्क अभिभावकबाट उठाउन बाध्य हुनेछन्, जसले शिक्षालाई थप महँगो बनाउनेछ,” उनले भने।
उनले सरकारले निजी शिक्षामाथि थप आर्थिक दायित्व थोपर्ने नीति तत्काल पुनर्विचार गरी इक्विटी ट्याक्सको निर्णय फिर्ता लिनुपर्ने माग गरे। यस प्रकारको करले गुणस्तरीय शिक्षामा पहुँच कमजोर बनाउनुका साथै निजी विद्यालय, विद्यार्थी र अभिभावक सबै प्रभावित हुने उनको भनाइ छ।
सरकारले चालु आर्थिक वर्षको बजेटमार्फत निजी शैक्षिक संस्थाले लिने विभिन्न शुल्कमा ३ प्रतिशत शिक्षा समानता सेवा शुल्क (इक्विटी ट्याक्स) लगाउने व्यवस्था गरेको छ। उक्त निर्णयविरुद्ध देशभरका निजी विद्यालयसँग सम्बन्धित संस्थाहरूले विरोध जनाउँदै आएका छन्। एन–प्याब्सन वीरगञ्जले पनि कर खारेजीको माग गर्दै अभिभावक, विद्यालय सञ्चालक तथा सरोकारवालासँग छलफललाई तीव्र बनाएको जनाएको छ।

प्रकाशित मिति: सोमबार, साउन ४, २०८३ २१:३३

प्रतिक्रिया दिनुहोस्