पत्रकार किशोर श्रेष्ठको रिहाइ माग गर्दै प्रहरी परिसरअगाडि पत्रकार महासंघको धर्ना

समाचार

गृहपृष्ठ
समाचार

पत्रकार किशोर श्रेष्ठको रिहाइ माग गर्दै प्रहरी परिसरअगाडि पत्रकार महासंघको धर्ना

choicekhabar बिहीबार, साउन २८, २०८३

२८ साउन, काठमाडौं । पत्रकार किशोर श्रेष्ठलाई विनाशर्त रिहाइको माग गर्दै नेपाल पत्रकार महासंघले काठमाडौं प्रहरी परिसरअगाडि धर्ना दिएको छ ।

महासंघका अध्यक्ष निर्मला शर्माको नेतृत्वमा पत्रकारहरूले कालोपट्टी बाँधेर प्रदर्शनसहित धर्ना दिएका हुन् । शान्तिपूर्ण रूपमा धर्नामा बस्न खोज्दा प्रहरीले रोकेपछि केहीबेर प्रहरी र पत्रकारबीच घम्साघम्सीसमेत भएको थियो ।

प्रदर्शनका क्रममा पत्रकारहरूले ‘प्रहरी दमन मुर्दावाद’, ‘राज्य आतंक बन्द गर’, ‘प्रेस स्वतन्त्रता पुनर्बहाली गर’, ‘पत्रकार किशोर श्रेष्ठलाई विनाशर्त रिहा गर’ लगायतका नारा लगाएका थिए । प्रदर्शनकारीले प्रेस स्वतन्त्रतामाथि हस्तक्षेप भएको भन्दै विभिन्न नारा लेखिएका प्लेकार्ड प्रदर्शन गर्नुका साथै कतिपयले बलिरहेको लाल्टिनसमेत बोकेका थिए ।

नेपाल प्रहरीले बुधबार जनआस्था साप्ताहिकका प्रधानसम्पादक किशोर श्रेष्ठलाई पक्राउ गरेको थियो । प्रहरीले श्रेष्ठविरुद्ध वैयक्तिक गोपनीयतासम्बन्धी ऐन, २०७५ विपरीतको कसुर गरेको आरोपमा पक्राउ गरी अनुसन्धान भइरहेको जनाएको छ ।

बिहीबार बिहान प्रहरीले जनआस्था साप्ताहिकको कार्यालयमा समेत खानतलासी गरेको थियो । महासंघले श्रेष्ठको पक्राउ र सञ्चारगृहमा गरिएको खानतलासीप्रति आपत्ति जनाउँदै तत्काल विनाशर्त रिहाइको माग गरेको छ ।

महासंघले श्रेष्ठलाई विनाशर्त रिहा नगरे कडा आन्दोलन गर्ने चेतावनी दिएको छ । महासंघ अध्यक्ष शर्मासहित पत्रकारहरूको टोलीले बुधबार राति पनि काठमाडौं प्रहरी परिसरअगाडि प्रदर्शन गरेको थियो ।

विश्व प्रेस काउन्सिलका वरिष्ठ उपाध्यक्षसमेत रहेका श्रेष्ठ प्रेस काउन्सिल नेपालका पूर्वअध्यक्ष तथा नेपाल पत्रकार महासंघका पूर्वमहासचिव हुन् । खोजी पत्रकारितामा छुट्टै पहिचान बनाएका श्रेष्ठ निर्भीक पत्रकारका रूपमा परिचित छन् ।

प्रकाशित मिति: बिहीबार, साउन २८, २०८३ १२:३३

प्रतिक्रिया दिनुहोस्