साउथ जोन माविद्वारा विपद् राहत कोषमा सहयोग गर्ने घोषणा

स्वास्थ्य/शिक्षा

गृहपृष्ठ
स्वास्थ्य/शिक्षा

साउथ जोन माविद्वारा विपद् राहत कोषमा सहयोग गर्ने घोषणा

choicekhabar मंगलबार, भदौ १६, २०८३

वीरगञ्ज । वीरगञ्ज महानगरपालिका–१३ राधेमाईस्थित साउथ जोन माध्यमिक विद्यालयले विपद् प्रभावितका लागि राहत सहयोग गर्ने निर्णय गरेको छ।

विद्यालय सञ्चालकको तर्फबाट सहयोग उपलब्ध गराउनुका साथै विद्यालयमा कार्यरत शिक्षक तथा कर्मचारीहरूले आफ्नो एक दिनको पारिश्रमिक बराबरको रकम सहयोग गर्ने निर्णय गरिएको प्याब्सन जिल्ला कार्यसमिति पर्साका अध्यक्ष सरोजप्रसाद चौधरीले जानकारी दिनुभयो।

त्यसैगरी विद्यालयले विद्यार्थी तथा अभिभावकहरूबाट समेत सहयोग रकम संकलन गर्ने भएको छ। संकलित रकममा विद्यालयको तर्फबाट थप सहयोगसमेत गरी एकमुष्ठ रूपमा प्याब्सन पर्साको खातामा जम्मा गरिने अध्यक्ष चौधरीले बताउनुभयो।

जम्मा भएको सहयोग रकम एकद्वार प्रणालीमार्फत केन्द्रीय प्याब्सन कार्यालय हुँदै प्रधानमन्त्री दैवी प्रकोप राहत कोषमा जम्मा गरिने उहाँले जानकारी दिनुभयो।

अध्यक्ष चौधरीका अनुसार विपद्को यस्तो कठिन परिस्थितिमा सबैको सहयोग र हातेमालो आवश्यक भएकाले प्याब्सन पर्सासँग आबद्ध सम्पूर्ण सदस्य विद्यालयहरूलाई पनि आ–आफ्नो तर्फबाट सहयोग रकम संकलन गरी प्याब्सन पर्साको खातामा जम्मा गर्न अपिल गरिएको छ।

साउथ जोन माध्यमिक विद्यालयले शिक्षक–कर्मचारी, विद्यार्थी तथा अभिभावकको सहभागितामा आर्थिक सहयोग संकलन गरी विपद् प्रभावितलाई राहत पुर्‍याउने अभियानमा योगदान गर्ने जनाएको छ।

प्रकाशित मिति: मंगलबार, भदौ १६, २०८३ १२:००

प्रतिक्रिया दिनुहोस्