भूमि व्यवस्थापनको तथ्याङ्क अनुसार आर्थिक वर्ष २०८१

समाचार

गृहपृष्ठ
समाचार

भूमि व्यवस्थापनको तथ्याङ्क अनुसार आर्थिक वर्ष २०८१–८२ को चैतमा घरजग्गा कारोबार उच्च

choicekhabar मंगलबार, वैशाख २, २०८२

चालु आर्थिक वर्षको गत चैतमा २०८१–८२ कै उच्च घरजग्गा कारोबार भएको छ । पछिल्ला महिनाहरुमा कारोबार क्रमकि रुपमा बढ्न थाल पछि घरजग्गा कारोबार लयमा फर्किने प्रयत्नमा देखिएको छ ।

भूमि व्यवस्थापन तथा अभिलेख विभागले उपलब्ध गराएको तथ्याङ्कले यस्तो देखाएको हो । चैतमा देशभरका मालपोत कार्यालय मार्फत ४९ हजार ८३२ वटा घरजग्गाको लिखत पारित भएका छन् । यो चाल आवकै सबैभन्दा धेरै हो । यद्यपि, गत आवको सोही महिनाको तुलनामा भने सामान्य घटेको देखिन्छ । हाल औसतमा साढे ४१ सय घरजग्गा खरिदबिक्री हुँदै आएको विभागले जनाएको छ ।

गत फागुनको तुलनामा कारोबार ८.१९ प्रतिशत वृद्धि भएको हो । गत फागुनमा देशभर ४६ हजार ६१ वटा मात्रै घरजग्गा किनबेच भएका थिए । गत पुसमा देशभर ४८ हजार १५६ वटा घरजग्गा खरिबिक्री भएको थियो । त्यसपछिका महिनाहरुमा घटेको थियो । विभागका अनुसार गत माघमा पनि ४६ हजार ६९ वटा किनबेच भएका थियो ।
चालु आर्थिक वर्षको ९ महिनामा भने देशभर तीन लाख ७४ हजार १७१ वटा घरजग्गा खरिदबिक्री भएका छन् । जबकि, गत आवको चैत मसान्तसम्ममा भने ३ लाख ८० हजार १७३ वटा घरजग्गाको लिखत पारित भएको थियो ।
विभागका अनुसार चालु आवको साउनमा ४३ हजार ८३५ वटा, भदौमा ३२ हजार ७९८, असोजमा ३० हजार ५२७, कात्तिकमा ३३ हजार ५१४, मंसिरमा ४३ हजार ३७९ वटा घरजग्गा किनबेच भएका थिए । विगत ३ वर्षदेखि सुस्त कारोबारलाई चलायमान बनाउन सकारी तवरबाट पनि धेरै प्रयासहरु भइरहेका छन् । कारोबार विस्तारै शिथिलताबाट उठ्ने प्रयासमा छ । अर्थतन्त्रमा देखिएको सकारात्मक सुधारसँगै घर जग्गा बजार पनि विस्तारै उकासिने अपेक्षा छ । सरकारी तवरबाट भएको नीतिगत सहजीकरणले पनि यसलाई थप टेवा पुगेको बताइन्छ ।

हाल बैंकिङ्ग प्रणालीमा लगानीयोग्य रकम अधिक नै छ । लगानीयोग्य रकम बैंकहरुमा थुप्रिएर बसेको अवस्था छन् । ब्याजदर पनि निरन्तर घटीरहेको छ । अन्य क्षेत्रको तुलनामा घरजग्गा कारोबारलाई नै चलायमान बनाउने गरि बैंकहरुले नै विभिन्न स्किमहरु पनि ल्याइरहेका छन् । निश्चित एकल अंकको ब्याजदरमै घरजग्गा कर्जा उपलब्ध गराउन बैंकहरु पनि तयार नै छन् । आर्थिक गतिविधि पनि बढ्न थालेको छ । यसले लगानीकर्ताहरुको मनोबल पनि बढाएका छन् । यस्तो अवस्थामा घरजग्गा कारोबार क्रमिक सुधार हुँदै आएको व्यवसायीहरु बताउँछन् ।

कारोबारसँगै राजश्व पनि दोहोरो अंकमा वृद्धि भएको छ । चालु आवको ९ महिनामा देशभरको कारोबारबाट ३३ अर्ब २२ करोड ४८ लाख ७८ हजार रुपैयाँ राजश्व उठेको छ । यो गत आवको सोही अवधिको तुलनामा भने १३.०८ प्रतिशत बढी हो । गत आवको सो अवधिमा भने सरकारले २९ अर्ब १९ करोिड ९३ लाख ६६ हजार रुपैयाँ राजश्व प्राप्त गरेको थियो ।

चालु आवको चैत महिनामा मात्रै सरकारले ४ अर्ब ३९ करोड ४६ लाख ८६ हजार रुपैयाँ राजश्व संकलन भएको छ । विभागका अनुसार गत फागुनमा ४ अर्ब १२ करोड रुपैयाँ, माघमा ३ अर्ब ८७करोड २४ लाख ८१ हजार, पुसमा ४ अर्ब २५ करोड २२ लाख, मंसिरमा ३ अर्ब ८७ करोड ४८ लाख २६ हजार राजश्व उठेको थियो ।

प्रकाशित मिति: मंगलबार, वैशाख २, २०८२ १८:४१

प्रतिक्रिया दिनुहोस्