बाढीमा बगेका धनमाल लुट्नेमाथि कडा निगरानी : आईजीपी कार्की

समाचार

गृहपृष्ठ
समाचार

बाढीमा बगेका धनमाल लुट्नेमाथि कडा निगरानी : आईजीपी कार्की

choicekhabar सोमबार, भदौ २२, २०८३

२२ भदौ, काठमाडौं । रसुवाको भोटेकोसी नदीमा आएको विनाशकारी प्रलयकारी विपद्पछि रसुवा, नुवाकोट र धादिङ जिल्लामा खोज, उद्धार तथा राहत कार्यका लागि नेपाल प्रहरीका करिब ८ हजार सुरक्षाकर्मीहरू अहोरात्र खटिएका छन् ।

बाढीग्रस्त क्षेत्रको स्थलगत अवलोकनपछि कान्तिपुर टेलिभिजनसँग कुराकानी गर्दै प्रहरी महानिरीक्षक (आईजीपी) दानबहादुर कार्कीले शताब्दीकै यस ठूलो विपद्मा सुरक्षा संयन्त्रले अकल्पनीय चुनौतीको सामना गरिरहेको बताउनुभएको छ । विपद्को १० दिन बितिसक्दा पनि वृद्ध महिला र चिनियाँ नागरिकको सकुशल उद्धार हुनुले आशा अझै जीवित रहेको उल्लेख गर्दै उहाँले सम्भावित सबै स्थानमा खोजी कार्य तीव्र पारिएको जानकारी दिनुभएको छ ।

विपद्पश्चात उत्पन्न सुरक्षा चुनौती र लुटपाटका घटनाहरूबारे बोल्दै आईजीपी कार्कीले केही स्थानमा मृतकका शव तथा बगेका घरबाट धनमाल र सुनचाँदी लुट्ने जस्ता अत्यन्त निन्दनीय र अमानवीय गतिविधिहरू देखिएकाले त्यस्ता प्रवृत्तिलाई कूटनीतिक तथा कानुनी रूपमा कडा नियन्त्रणमा लिइएको स्पष्ट पार्नुभएको छ । रसुवादेखि पश्चिम नवलपरासीसम्मका नदी किनारका क्षेत्रहरूमा स्थानीय समुदाय, राजनीतिक दल र अन्य सुरक्षा निकायसँगको सहकार्यमा ‘स्विप’ अभियान सञ्चालन गरिएको बताउँदै उहाँले बैंकका कागजात, एटीएम कार्ड तथा सुनचाँदीजस्ता बहुमूल्य सामग्रीहरू फेला परेमा जथाभाबी नलुकाई सम्बन्धित निकायमा बुझाउन सख्त निर्देशन जारी गरिएको जानकारी दिनुभयो ।

त्यसैगरी, विस्थापित तथा पुनःस्थापना केन्द्रहरूमा महिला र बालबालिकाको सुरक्षालाई उच्च प्राथमिकतामा राखिएको छ। अभिभावक गुमाएका ३० र एकल अभिभावक भएका १३ जना बालबालिकाको तथ्यांक संकलन गरी उनीहरूको आत्मसम्मान र सुरक्षाका लागि सादा पोसाकका महिला प्रहरीहरू परिचालन गरिएको छ ।

यस भीषण विपद्को सामना गर्ने क्रममा कर्तव्य पालना गर्दा ज्यान गुमाएका तथा बेपत्ता भएका प्रहरीहरूको उच्च मनोबल कायम राख्न आर्थिक सहायता, बिमा, परिवारका लागि सम्पर्क अधिकृतको व्यवस्था तथा सन्ततिलाई निःशुल्क शिक्षा र रोजगारीको ग्यारेन्टी गरिएको प्रहरी महानिरीक्षक कार्कीले बताउनुभएको छ ।

प्रकाशित मिति: सोमबार, भदौ २२, २०८३ १४:२८

प्रतिक्रिया दिनुहोस्