प्रहरी जवानको पीडामा मल्हम लगाउँदै बिजेश्वर प्रसाद चौधरी, अस्थायी प्रहरी चेकपोस्टमा प्लाइ जडान गरी दिए

समाचार

गृहपृष्ठ
समाचार

प्रहरी जवानको पीडामा मल्हम लगाउँदै बिजेश्वर प्रसाद चौधरी, अस्थायी प्रहरी चेकपोस्टमा प्लाइ जडान गरी दिए

आनन्द पटेल सोमबार, कात्तिक १६, २०८३

वीरगञ्ज। प्रहरी जवानहरूको सुरक्षा र सहज कार्यवातावरणका लागि समाजका जिम्मेवार नागरिकले पनि महत्वपूर्ण भूमिका खेल्न सक्छन् भन्ने उदाहरण जगर्नाथपुर गाउँपालिका–४ सुहपुरका बिजेश्वर प्रसाद चौधरीले प्रस्तुत गरेका छन्।

जगर्नाथपुर गाउँपालिका–४ सुहपुरमा अवस्थित अस्थायी प्रहरी चेकपोस्टमा कार्यरत प्रहरी जवानहरूले लामो समयदेखि भोग्दै आएको समस्यालाई मध्यनजर गर्दै चौधरीले चेकपोस्टको टिनको छानामुनि प्लाइ जडान गराएर सहयोग गरेका छन्।

टिनले छाएको उक्त प्रहरी चेकपोस्टमा गर्मी मौसममा चर्को घामका कारण भित्र अत्यधिक तापक्रम बढ्ने गरेको थियो। दिउँसो मात्र होइन, रातिको समयमा समेत टिन तातिरहँदा प्रहरी जवानहरूलाई आराम गर्न र ड्युटी गर्न निकै कठिन हुने गरेको थियो।

त्यस्तै, जाडो मौसममा टिनमा शीत जमेर पानी चुहिने समस्याले पनि प्रहरी जवानहरू थप समस्यामा पर्ने गरेका थिए। टिनबाट चुहिएको पानी ओछ्यानसम्म पुग्दा रातको समयमा आराम गर्नसमेत कठिन हुने अवस्था थियो।

प्रहरी जवानहरूले आफ्नो समस्याबारे स्थानीय जनप्रतिनिधिहरूसमक्ष पटक–पटक जानकारी गराए पनि समाधानका लागि अपेक्षित पहल हुन नसकेको बताइएको छ।

अन्ततः प्रहरी जवानहरूले आफ्नो समस्या बिजेश्वर प्रसाद चौधरीसमक्ष राखेपछि उनले तत्काल सहयोग गर्ने प्रतिबद्धता जनाए। प्रहरी जवानहरूको पीडा सुनेलगत्तै उनले सोही दिन बिहानदेखि आवश्यक सहयोग जुटाउने काम सुरु गरे र दिनको अन्त्यसम्ममा टिनको छानामुनि प्लाइ जडान गर्ने काम सम्पन्न गराए।

प्लाइ जडान भएपछि चेकपोस्टभित्रको वातावरण पहिलेभन्दा सहज बनेको छ। यसले गर्मी मौसममा टिनबाट आउने अत्यधिक तापको असर कम गर्नुका साथै जाडो मौसममा पानी चुहिने समस्याबाट पनि राहत मिल्ने अपेक्षा गरिएको छ।
चौधरीको यस सहयोगप्रति त्यहाँ कार्यरत प्रहरी जवानहरूले खुसी व्यक्त गर्दै धन्यवाद दिएका छन्।

'प्रहरी जवानहरू नै सुरक्षित र सहज वातावरणमा रहेनन् भने नागरिकको सुरक्षा कसरी सुनिश्चित हुन सक्छ ?' भन्ने भावनासहित गरिएको चौधरीको यो सहयोगले प्रहरीप्रतिको सामाजिक उत्तरदायित्व र मानवीय संवेदनाको सकारात्मक उदाहरण प्रस्तुत गरेको छ।

राज्यको सुरक्षा जिम्मेवारी बहन गर्ने प्रहरी कर्मचारीहरूको आधारभूत सुविधा र कार्यवातावरण सुधारमा सम्बन्धित निकायसँगै समाजका नागरिकको पनि उत्तिकै चासो र सहयोग आवश्यक रहेको यस घटनाले सन्देश दिएको छ।

प्रकाशित मिति: सोमबार, कात्तिक १६, २०८३ १०:३०

प्रतिक्रिया दिनुहोस्