हेटौँडा–काठमाडौँ सडकखण्डमा यातायात पुनः सुचारु

समाचार

गृहपृष्ठ
समाचार

हेटौँडा–काठमाडौँ सडकखण्डमा यातायात पुनः सुचारु

choicekhabar शुक्रबार, असोज १८, २०८१

वीरगञ्ज । त्रिभुवन राजमार्ग अन्तर्गत हेटौँडा–चित्लाङ–चन्द्रागिरि–काठमाडौँ सडक खण्डमा आज बिहानदेखि यातायात पुनः सञ्चालनमा आएको छ ।

भारी वर्षाका कारण यातायात अवरुद्ध भएपछि स्थानीय प्रशासनले सुरक्षा सावधानी स्वरूप सवारीसाधन चलाउन रोक लगाएको थियो, तर अब सडकमा कुनै किसिमको अवरोध नरहेकाले सवारी सञ्चालन पुनः सुचारु भएको मकवानपुर प्रहरी कार्यालयका निमित्त प्रवक्ता ठाकुरप्रसाद सापकोटाले जानकारी दिए ।

बागमती प्रदेश सरकारको भौतिक पूर्वाधार विकास मन्त्रालयको प्राविधिक टोली, सडक विभाग, र सुरक्षाकर्मीहरूको सहकार्यमा पहिरो पन्छाउने र क्षतिग्रस्त संरचना मर्मत गर्ने कार्य भइरहेको छ ।

हेटौँडा–पालुङ–नौबिसे सडक खण्डमा अहिले हलुका सवारी साधन सञ्चालन भएका छन्, जबकि हेटौँडा–भैँसे–रातोमाटे खण्डको गोल्पिङबेँसीमा ठूला ढुङ्गा पन्छाउने काम चार वटा मेसिनको सहायताले भइरहेको छ ।

इन्द्रसरोवर गाउँपालिकाको सिमखोलासम्मका क्षेत्रमा पहिरो पन्छाउने काम पूरा भएको छ भने कुलेखानी पुलको निर्माण कार्य पनि तीव्र रूपमा भइरहेको छ । यसै गरी, दक्षिणकाली–फर्पिङ सडक खण्डमा महालक्ष्मी खोला र फाखेलसम्मको क्षेत्रका पहिरो पन्छाउन दुई वटा मेसिन चलाइएको छ ।

पहिरोको कारण अवरुद्ध सडक सुचारु गर्न विभिन्न निकायको सक्रियतामा काम भइरहेको छ ।

प्रकाशित मिति: शुक्रबार, असोज १८, २०८१ ११:३६

प्रतिक्रिया दिनुहोस्