मधेस प्रदेशका मुख्यमन्त्री सिंहले राम मन्दिर ट्रस्टका महासचिव रायलाई गरे विवाह पञ्चमीको निमन्त्रणा पत्र हस्तान्तरण

समाज

गृहपृष्ठ
समाज

मधेस प्रदेशका मुख्यमन्त्री सिंहले राम मन्दिर ट्रस्टका महासचिव रायलाई गरे विवाह पञ्चमीको निमन्त्रणा पत्र हस्तान्तरण

choicekhabar सोमबार, मंसिर ३, २०८१

भारतको अयोध्यामा आयोजित तिलकोत्सव समारोहमा मधेस प्रदेशका मुख्यमन्त्री सतिशकुमार सिंहले राम मन्दिर ट्रस्टका महासचिव चम्पत रायलाई जनकपुरधाममा हुने विवाह पञ्चमी समारोहको निमन्त्रणा पत्र हस्तान्तरण गरेका छन् ।

विश्व हिन्दु परिषद् नेपालको धनुषा शाखाद्वारा आयोजित यस विशेष कार्यक्रममा मुख्यमन्त्री सिंहले नेपाल र भारतबिचको ऐतिहासिक, सांस्कृतिक, धार्मिक तथा सामाजिक सम्बन्धलाई स्मरण गर्दै आगामी दिनमा दुई देशबिचको सम्बन्ध अझ सुदृढ हुने विश्वास व्यक्त गरे । उनले विवाह पञ्चमीको परम्परा संरक्षण र प्रवर्द्धनमा नागरिक स्तरदेखि सरकारसम्म सबैको योगदान महत्त्वपूर्ण रहेको बताए ।

कार्यक्रममा राम मन्दिर ट्रस्टका महासचिव चम्पत रायले जनकपुरधाम र अयोध्या बिचको सम्बन्धलाई अझ गाढा बनाउन नेपाल र भारत सरकार तथा दुवै देशका नागरिकहरूले खेलेको भूमिकाको प्रशंसा गरे । उनले विवाह पञ्चमीको महत्त्वलाई अन्तर्राष्ट्रिय स्तरमा उजागर गर्न दुवै देशका सरकारले सहकार्य गर्नुपर्नेमा जोड दिए ।

मुख्यमन्त्री सिंहको नेतृत्वमा मधेस प्रदेशका २५१ सदस्यीय टोली तिलकोत्सव समारोहका लागि अयोध्या पुगेको छ । टोलीमा प्रदेश सरकारका वन तथा वातावरण मन्त्री त्रिभुवन साह, गृह तथा सञ्चार मन्त्री राजकुमार लेखी, श्रम तथा यातायात मन्त्री कौशल किशोर राय, उद्योग, वाणिज्य तथा पर्यटन मन्त्री सकिल अलि मियाँ, स्वास्थ्य तथा जनसङ्ख्या मन्त्री शत्रुधनप्रसाद सिंह, प्रदेशसभा सदस्य रुपा यादव, जनकपुरधाम उपमहानगरपालिकाका प्रमुख मनोज साहलगायतका विशिष्ट व्यक्तिहरू सहभागी छन् ।

जनकपुरधामस्थित जानकी मन्दिरबाट मिष्ठान, फलफूल, लत्ताकपडा, गरगहनालगायत १०५ प्रकारका सामग्री लिएर अयोध्यामा श्रीराम मन्दिर ट्रस्टलाई हस्तान्तरण गरिएको छ । टोली वीरगञ्ज हुँदै रक्सौलबाट भारतीय भूमि प्रवेश गरी अयोध्या पुगेको थियो । जनकपुरधाममा यही मङ्सिर २१ गते रामजानकी विवाह पञ्चमी समारोह भव्य रूपमा मनाइने तयारी भइरहेको छ ।

प्रकाशित मिति: सोमबार, मंसिर ३, २०८१ १७:२७

प्रतिक्रिया दिनुहोस्