नेपाल पत्रकार महासङ्घको निर्वाचन आज देशभर हुदैँ

राजनीति

गृहपृष्ठ
राजनीति

नेपाल पत्रकार महासङ्घको निर्वाचन आज देशभर हुदैँ

choicekhabar शुक्रबार, मंसिर २८, २०८१

वीरगञ्ज। नेपाल पत्रकार महासङ्घको नयाँ नेतृत्व चयनका लागि आज देशभर मतदान हुँदै छ । केन्द्रीय समिति, १० प्रदेश समिति, ७७ जिल्ला शाखा र ४१ प्रतिष्ठान शाखाका लागि नयाँ नेतृत्व चयन गर्न मतदानको प्रक्रिया अघि बढेको छ । उम्मेदवार मनोनयन प्रक्रिया सम्पन्न भइसकेको छ, र निर्वाचन समितिले सबै तयारी पूरा भएको जनाएको छ ।

यस पटकको निर्वाचनमा तीन प्रकारका मतपत्र प्रयोग गरिनेछ । केन्द्रीय पदाधिकारीका लागि हल्का निलो, प्रदेशबाट निर्वाचित केन्द्रीय सदस्यका लागि सेतो, र अन्य केन्द्रीय सदस्य तथा लेखा समितिका लागि हल्का गुलाबी रङको मतपत्र छ । प्रदेश र शाखा कार्यसमितिहरूले भने आफ्नो क्षेत्रअनुसार मतपत्रको रङ र ढाँचा आफैँ चयन गर्न पाउनेछन् ।

मतदानका लागि महासङ्घले जारी गरेको परिचयपत्र, सूचना तथा प्रसारण विभागको परिचयपत्र, नागरिकताको प्रमाणपत्र, राष्ट्रिय परिचयपत्र, वा नेपाल सरकारले जारी गरेको तस्बिरसहितको परिचय खुल्ने प्रमाणपत्र अनिवार्य गरिएको छ ।

केन्द्रीय समितिको अध्यक्ष पदका लागि चार उम्मेदवार रहेका छन् । देवीप्रसाद सापकोटा, निर्मला शर्मा, रमेश विष्ट र लालसिंह लामा यस पदका दाबेदार हुन् । वरिष्ठ उपाध्यक्षका लागि गोविन्दप्रसाद चौलागाईं, दीपक आचार्य र रोशन पुरी प्रतिस्पर्धामा छन् भने महिला उपाध्यक्ष पदमा गङ्गा पौडेल र नितु पण्डितबिच प्रतिस्पर्धा हुँदै छ ।

समावेशी उपाध्यक्षका लागि उमिदप्रसाद बागचन्द, मोहनकुमार सिंह र सुभाषप्रसाद साह उम्मेदवार रहेका छन् । महासचिव पदमा जन्मदेव जैसी, प्रकाश थापा, रामप्रसाद दाहाल र लेखनाथ न्यौपाने प्रतिस्पर्धा गर्दै छन् ।

चुनावी माहौलले महासङ्घका सदस्यहरूमा उत्साह थपेको छ । नयाँ नेतृत्वले महासङ्घको भविष्यलाई कसरी निर्देशित गर्नेछ भन्नेमा सबैको ध्यान केन्द्रित भएको छ ।

प्रकाशित मिति: शुक्रबार, मंसिर २८, २०८१ ११:१२

प्रतिक्रिया दिनुहोस्