सोलुको गोक्यो तालमा आत्महत्या प्रयास गर्न पुगेका चिनियाँ नागरिकको हेलिकप्टरमार्फत उद्धार

समाचार

गृहपृष्ठ
समाचार

सोलुको गोक्यो तालमा आत्महत्या प्रयास गर्न पुगेका चिनियाँ नागरिकको हेलिकप्टरमार्फत उद्धार

choicekhabar मंगलबार, जेठ २७, २०८२

काठमाडौं । ‘जन्मदिनको दिन आत्महत्या गर्छु’ भन्दै सोलुखुम्बुस्थित करिब ५ हजार मिटर उचाइमा रहेको गोक्यो ताल पुगेका एक चिनियाँ पर्यटकको नेपाल प्रहरीले उद्दार ९रेस्क्यु० गरेको छ ।

नेपाल प्रहरीको पर्यटक प्रहरी, भृकुटीमण्डपबाट गएको टोलीले ती चिनियाँ नागरिकलाई सकुशल उद्धार गरेको हो । छेई हुवाङ नाम गरेका ३६ वर्षीय चिनियाँ पर्यटकको प्रहरीले मंगलबार बिहान उद्धार गरेको हो ।

काठमाडौंस्थित चिनियाँ दूतावासले पर्यटक प्रहरीलाई खबर गर्दै हुवाङलाई उद्धार गर्न भनेको थियो । दूतावाससँगै पेम्बा शेर्पा नाम गरेका व्यक्तिले पनि प्रहरीलाई घटनाबारे जानकारी गराएका थिए ।

हुवाङले ११ जुनका दिन आफ्नो ३६ औं जन्मदिनमा गोक्यो तालमा आत्महत्या गर्ने भन्दै सामाजिक सञ्जालमा एक पोस्ट गरेका थिए । त्यसपछि चीनमा रहेका परिवारले उनको अवस्थाबारे जानकारी पाएका थिए । परिवारले नै काठमाडौंस्थित चिनियाँ दूतावासमा खबर गरेर उद्धार गरिदिन भनेका थिए ।

त्यसपछि दूतावासले पर्यटक प्रहरीलाई खबर गरेको थियो । प्रहरी स्रोतका अनुसार उद्धारका लागि नेपाल प्रहरीलाई दूतावासले नै हाई अल्टिच्युडको हेलिकप्टरको व्यवस्था गरिदिएको थियो ।

प्रहरी घटनास्थल पुग्दा उनलाई गोक्योको ‘टंक इन होटल’का सञ्चालकले सम्झाउँदै राखेका थिए । तर उद्धार गर्न गएको प्रहरीले भन्दा पनि उनी आउन मानेनन् ।

गोक्यो तालमा भोलि जन्मदिनको अवसरमा आत्महत्या गर्ने आफ्नो योजना रहेको उनले प्रहरीलाई बताएका थिए । प्रहरी स्रोतका अनुसार करिब आधा घण्टासम्म सम्झाएपछि बल्ल हुवाङ काठमाडौं आउन तयार भएका थिए ।

हेलिकप्टरमार्फत अहिले उनलाई उद्धार गरेर काठमाडौं ल्याइएको छ । पर्यटक प्रहरी भृकुटीमण्डपमा रहेका उनलाई अब दूतावासको जिम्मा लगाउने तयारी भएको प्रहरीले बताएको छ ।

प्रकाशित मिति: मंगलबार, जेठ २७, २०८२ १२:५४

प्रतिक्रिया दिनुहोस्